Астанада өтіп жатқан Kazakhstan Energy Week – 2025 және XVI Еуразиялық KAZENERGY форумында Премьер-министр Олжас Бектенов Мемлекет басшысы Қасым-Жомарт Тоқаевтың арнайы үндеуін оқып берді, – деп хабарлайды 7-su.kz ақпараттық порталы.
Премьер-министрдің айтуынша, дүниежүзілік энергетика апталығы аясында ұйымдастырылып отырған форум – жаһандық энергетикалық қауіпсіздікті нығайту және энергия ресурстарын тиімді пайдалану мәселелерін талқылайтын маңызды алаңға айналған.
Өз үндеуінде Президент Тоқаев KAZENERGY қауымдастығының 20 жылдығымен және форумның ашылуымен қатысушыларды құттықтап, энергетика саласының маңыздылығына тоқталды.
«Қазір жаңа тарихи кезең басталды. Түбегейлі өзгерістер энергетика секторына да әсерін тигізіп жатыр. Жаһандық сын-қатерлердің артуы, халықаралық қатынастардағы дағдарыстың күшеюі мен логистикалық тізбектердің бұзылуы әлемдік ахуалды күрделендіре түсті. Осындай алмағайып жағдайда тиімді ықпалдастықтың жаңа жолдарын табу – баршамыздың ортақ міндетіміз», – делінген Мемлекет басшысының құттықтау хатында.
Президенттің атап өтуінше, экономика, ғылым-білім, инновация және озық технологиялардың дамуы қуат көздерінің қолжетімділігіне тікелей байланысты. Осы мақсатта Қазақстан энергетикалық қауіпсіздік пен дербестікті күшейту үшін ірі жобаларды жүзеге асырып жатыр.
«Бұл маңызды іске халықаралық серіктестеріміз зор үлес қосып келеді. Қазақстан энергетика саласына инвестиция тартуға және оның бәсекеге қабілеттілігін арттыруға ерекше көңіл бөледі. Жауапкершілігі жоғары орта держава ретінде еліміз БҰҰ, ШЫҰ, МАГАТЭ, ОПЕК сынды беделді халықаралық ұйымдармен ынтымақтастықты нығайтып, ортақ мүдде үшін бірлесіп жұмыс істеуге ниетті», – делінген Президент үндеуінде.
