1 қыркүйектен бастап еліміздегі барлық мектеп, балабақша, колледж және сауықтыру лагерлерінде жаңа тамақтану стандарты қолданысқа енді, – деп хабарлайды 7-su.kz ақпараттық порталы.
Жаңа ереже Денсаулық сақтау министрлігі мен Оқу-ағарту министрлігінің бастамасымен, сондай-ақ Қазақ тамақтану академиясы, ЮНИСЕФ және Дүниежүзілік денсаулық сақтау ұйымы (ДДҰ) сияқты халықаралық ұйымдардың қолдауымен әзірленді.
ҚР ДСМ Санитариялық-эпидемиологиялық бақылау комитеті төрағасының орынбасары Нұрқан Сәдуақасовтың айтуынша, жаңа стандартқа сәйкес:
-
тағамдардағы қант мөлшері 3,6 есе, ал тұз көлемі 5 есе азайтылды;
-
ас мәзірінде көкөністер, жемістер мен сүт өнімдерінің үлесі артты;
-
шұжық өнімдері, қақталған тағамдар мен тәтті газдалған сусындар толықтай алынып тасталды;
-
балаларға сусын ретінде су, сүт, қышқыл сүт өнімдері, жеміс шайлары және қант мөлшері төмен компоттар ұсынылады.
Сонымен бірге, алғаш рет шағын жинақталған мектептерде тамақтануды ұйымдастыруға арналған жеке талаптар енгізілді. Арнайы диеталық қажеттіліктері бар балалар үшін бөлек ережелер қарастырылды. Сондай-ақ жаңа стандартта «Жеуге жарамсыздық индексі» ұғымы пайда болды.
Бұл өзгерістердің барлығы оқушылардың денсаулығын нығайтып, дұрыс тамақтану мәдениетін қалыптастыруға бағытталған.
