Бүгін, 6 қазан күні, Қазақстанның бірқатар өңірінде ауа райының күрт өзгеруіне байланысты дауылды ескерту жарияланды, – деп хабарлайды 7-su.kz ақпараттық порталы «Қазгидрометке» сілтеме жасап.
Синоптиктердің мәліметінше, елдің оңтүстік облыстарында шаңды дауыл мен қатты жел соғады. Шымкент қаласында желдің екпіні 15–20 м/с-қа дейін жетуі мүмкін.
Алматы, Қонаев, Тараз және Талдықорған қалаларында ауа температурасы -5–7 градусқа дейін төмендеп, үсік жүруі ықтимал. Сонымен қатар Ақтау, Атырау, Орал қалаларында, сондай-ақ Ұлытау және Қостанай облыстарында өрт қаупі жоғары деңгейде сақталады.
Ерекше қолайсыз ауа райы Атырау, Маңғыстау және Батыс Қазақстан облыстарында күтіледі. Бұл өңірлерде қатты жел соғып, төтенше өрт қаупі сақталады.
Ал Алматы, Жетісу және Жамбыл облыстарында тұман түсіп, жел соғады және -1–3 градусқа дейін үсік жүруі мүмкін.
Қызылорда мен Түркістан облыстарында синоптиктер шаңды дауыл, қатты жел және төтенше өрт қаупі туралы ескерту жасап отыр.
Мамандар тұрғындарға ауа райының күрт құбылуына дайын болуға және қауіпсіздік шараларын сақтауға кеңес береді.
