Қазақстандағы кәсіподақ қозғалысының тарихы ХХ ғасырдың басынан бастау алып, биыл оның құрылғанына 120 жыл, ал Кәсіподақтар федерациясына 35 жыл толды.
Осындай атаулы даталарға байланысты «Тарихқа – тағзым, бүгінге – өзгеріс, келешекке – сенім» ұранымен кәсіподақ мүшелері мен белсенді азаматтардың қатысуымен Жетісу облысы, Талдықорған қаласы, Қаратал өзенінің жағалауында «KASIPODAQ RUN» ынтымақтастық жарысы өтті.
Шараның сәтті әрі жоғары деңгейде өтуіне облыс әкімінің орынбасары қатысып, ұйымдастырушылар мен қатысушыларға сәттілік тіледі.
Жалпы 547 адам қатысып, 4 шақырымдық қашықтықты жүгіріп өткендерге арнайы медальдар мен сертификаттар, ал жүлдегерлерге ҚР Кәсіподақтар федерациясының дипломдары мен сыйлықтары табысталды. Сондай-ақ «Ең жас қатысушы», «Ең үлкен қатысушы» номинациялары бойынша да жеңімпаздар анықталып, марапаттар берілді.
Қатысушылар өздерінің бекітілген нөмірлерімен лотерея ойынына қатысып, қосымша сыйлықтар иеленді. Бас жүлде — 10 күнге «Көктем» шипажайына жолдама болды.
Жарыс өте тартымды өтіп, қатысушылар марафон өткен жағажайды қалдықтардан тазартып, экологиялық мәдениеттің үлгісін көрсетті.
