Жетісу облысына ҚР Ұлттық экономика вице-министрі Асан Дарбаев, Қаржы министрлігі Мемлекеттік кірістер комитетінің департамент директоры Қадыр Ысмағұлов және Ауыл шаруашылығы министрлігі өкілдері жұмыс сапарымен келді.
Талдықорғандағы Салтанат сарайында өткен кездесуді облыс әкімінің орынбасары Әсет Қанағатов жүргізді. Жиын елімізде қабылданған жаңа Салық кодексінің негізгі ережелерін түсіндіруг мақсатында өтті.
Асан Дарбаев өз сөзінде елімізде жүзеге асырылып жатқан экономикалық реформалардың мәнін баян етті. Оның айтуынша, жаңа бюджет саясаты Ұлттық қордың қаражатын тиімді пайдаланып, экономиканың тұрақты дамуын қамтамасыз етуге бағытталған.
Қадыр Ысмағұлов 2026 жылдан күшіне енетін жаңа Салық кодексіндегі басты өзгерістерге тоқталды. Атап айтқанда, жаңа Салық кодексі салық жүйесін айтарлықтай жеңілдетуді көздейді. Онда салық түрлерінің саны 20 пайызға азайып, есептілік көлемі 30 пайызға қысқарады. Арнайы салық режимдері жетіден үшеуге дейін қысқартылып, НДС (қосылған құн салығы) ставкасы 16 пайыз деңгейінде бекітіледі. Сонымен қатар, әлеуметтік сала ұйымдарына 5–10 пайыздық төмендетілген салық мөлшерлемесі енгізілмек. Ал жеке табыс салығы бойынша табыс деңгейіне қарай прогрессивті шкала қолданылады. Бұл өзгерістердің барлығы салық салу жүйесін әділ, түсінікті және бизнес үшін қолайлы етуге бағытталған.
Сонымен қатар, жаңа кодекс аясында салықтық әкімшілендіру сервис түріне ауысып, бизнес пен салық органдары арасындағы өзара әрекет ашық әрі ыңғайлы болмақ.
«Жетісу-Ақпарат»
