Жетісу жұрты поэзия мен әуенге, мейірім мен рухқа толы бір ерекше кештің куәсі болды. Талдықорғандағы мәдениет ордасында өткен бұл шара халқына еңбегімен де, өлеңімен де, әнімен де жақын Ғабит Тұрсынбайұлының 60 жылдық мерейтойына арналды.
Кештің шымылдығы ашылған сәттен-ақ залды толтырған жұртшылыққа поэзияның мөлдір тынысы сезілді. Жүргізуші Гүлзия Байбосынованың жүрекке жылы сөздерімен сахна төріне шақырылған мерейтой иесі Ғабит Тұрсынбай- ұлы сабырлы қадамымен көптің алдына шықты.
Ғабит – тек ақын емес, елге еңбегі сіңген қызметкер. Ақсу ауданының Құрметті азаматы, І. Жансүгіров атындағы Жетісу университетінің Құрметті профессоры, мемлекеттік марапаттардың иегері. Көргені көп, сөзі салмақты, болмысы сабырлы қалпымен ол ел алдында әрдайым биіктен көрініп келеді.
Кешке облыс әкімінің орынбасары Диас Есдәулетов арнайы қатысып, облыс әкімінің Алғыс хатын табыстады. Қала әкімі Ернат Бәзіл кеш иесіне ақжарма тілегін білдірді. Сондай-ақ, облыстың ардагерлері, шығармашылық одақ өкілдері мен ақын-жазушылар сахна төрінде жүрекжарды лебіздерін арнады. Әсіресе мерейтой иесінің жаңа кітабы – балаларға арналған «Атаның қоржынынан» атты жинақтың тұсаукесері көпшілікке үлкен қуаныш сыйлады. Бұл кітаптың жарық көруі – Ғабит Тұрсынбайұлының жас ұрпаққа арнаған ерекше тартуы іспетті.
Кеш барысында шәкірттері өлең оқып, ардагерлер ақ тілек айтып, әншілер ән шырқатты. Жетісудың белгілі композиторы Әли Алпысбаев жүрекжарды лебізімен бөлісіп, әсерлі әнін тарту етті. Ал сахна төрінен естілген «Ұстазым – мектебім» әні бүкіл залды ерекше толқытты.
Жылылық пен ізгілікке толы кеш соңында Ғабит Тұрсынбай- ұлы өз өмір жолына шолу жасап, өнерге деген адалдығын тағы бір мәрте дәлелдегендей болды. Оның жырлары мен әндері – елге аманат, ұрпаққа өнеге.
Жетісу даласы әрдайым осындай дара тұлғаларымен мақтана алады. «Өнерім – өмірім» атты шығармашылық кеш соның айғағы іспетті рухани мерекеге айналды.
Гүлжан ТҰРСЫН
