І. Жансүгірова атындағы университет Қазақстан Республикасының Конституциялық сотымен бірлесіп «Қазақстан Республикасының Конституциясы: құқықтық эволюция мен институционалдық трансформацияға 30 жыл» атты «дөңгелек үстел» өткізді.
Мұндағы мақсат – Конституцияның құқықтық мемлекетті қалыптастыру мен дамытудағы, заңның үстемдігін қамтамасыз етудегі, азаматтардың құқықтары мен бостандықтарын қорғаудағы, сондай-ақ, қазіргі заманғы сын-қатерлер жағдайында Конституциялық сот төрелігін жаңғыртудың рөлін талқылау болды.
Жиында Қазақстан Республикасы Конституциялық Сотының судьясы Роман Подопригора, облыс прокуроры Бауыржан Жұмақанов, ҚР Конституциялық Сотының талдаушысы Дәурен Шәріпбаев, облыстық полиция департаменті бастығының орынбасары Руслан Чарапиев баяндама жасады.
Олар Конституцияның құқықтық мемлекет қалыптастырудағы рөлі, сот төрелігін жетілдіру жолдары, азаматтардың құқықтары мен бостандықтарын қорғаудың заманауи тетіктері, мемлекеттік басқару жүйесіндегі институционалдық реформалардың нәтижелері, құқықтық мәдениетті арттыру және заңның үстемдігін қамтамасыз ету сынды тақырыптарда баяндама жасады.
«Дөңгелек үстел» отырысы барысында қатысушылар Ата Заңның қазіргі даму кезеңіндегі маңызы мен рөлін талқылады және құқықтық мемлекет пен демократиялық қағидаттарды нығайту жөнінде ұсыныстар дайындады.
Дастанбек САДЫҚ
