Жас ұрпаққа көңіл бөлу, шығармашылық қабілетін шыңдап, саламатты өмір салтына бейімдеу болашаққа жасалған негізгі қадам. Облыста мемлекеттік және қаржылай қолдаудың нәтижесінде балалардың жан-жақты дамуына бағытталған көптеген жекеменшік орталық ашылуда. Ол мекемелер табысты жұмыс істеп қана қоймай, бала денсаулығын жақсартуға айтарлықтай үлес қосуда.
Талдықорған қаласындағы «Brilliant» өнер мектебінің ашылғанына биыл 5 жыл. Бұл оқу ордасында бүгінде жиырмадан астам маман еңбек етіп, 5 пен 16 жас аралығындағы 600-ден астам бала түрлі өнер бағытында білім алып жүр. Алғашында шағын ғимаратта жұмысын бастаған орталық мемлекеттен қолдау тауып, бүгінде сұранысқа ие өнер ордасына айналып отыр. 2024 жылы кәсіпкерлікті дамытуға бағытталған «Даму» қоры мекемеге 77 миллион теңге көлемінде несие беріп, сол қаражатқа балалардың шығармашылық қабілеттерін дамытуға қажетті құрал-жабдықтар сатып алыныпты.
«Brilliant» шығармашылық мектебінің директоры Шолпан Әздерова:
– «Brilliant» шығармашылық мектебі 2020 жылы құрылды. Бұл оқу орнын ашу идеясы маған пандемия кезінде келді. Жалпы баласын дамытқысы келетін, оның денсаулығын жақсартуды ойлаған ата-ана осындай шығармашылық орталықтарға келгендері жөн деп санаймын. Себебі, қазіргі көп бүлдіршін телефонға үңіліп уақыттарын зая кетіруде. Олар одан физикалық тұрғыда дамымайды ғой. Күн өткен сайын біздің шығармашылық мектебімізге қызығатын жандардың қатары артуда, – дейді.
Бүгінде Талдықорғанда аталған білім ошағының 4 бірдей филиалы жұмыс істейді. Онда өрендер сурет салу, би, вокал және басқа да бағыттар бойынша өз-өздерін дамытуда. Солардың бірі – «Балдырған» балабақшасының тәрбиеленушісі Хафиза Ілиясқызы.
– Анам мені күнде би үйірмесіне алып келеді. Апайым Диана Мырзағалиева бізге жаттығу жасатады, би билетеді. Ол өте жақсы адам. Өскенде биші боламын, – дейді ол.
Мұнда әлеуметтік жағдайы төмен отбасылардың балаларын машықтандырып, оқыту үшін жеңілдіктер бар. Алдағы уақытта орталық өз аясын кеңейтіп, балалардың шығармашылық әлеуетін арттыру бағытында жаңа жобаларды жүзеге асыруды жоспарлауда.
Медет ЖҰМАБАЙ
