Өлең мен өмірдің, сезім мен сырдың тоғысқан, тыңдаушы жүрегіне шуағын төккен әдеби-сазды кеште ақынның «Жүрек домбырасы», «Ғазал-ғұмыр», «Елге сәлем», «Туған жер» сынды туындылары оқылып, әнге айналған жырлар орындалды. Көрермен қауым поэзияның мөлдір әлеміне еніп, ақынның жүрек үнімен сырласты.
Әдеби-сазды кешті облыстық «Jetіsý» газетінің бас редакторы Жұматай Әміреев жүргізіп, көрерменмен еркін тіл табысып, әр өлеңнің астарындағы ой мен сазды шебер өрді. Оның мәнерлі сөзі, әдебиетке деген ықыласы мен жылы лебізі шараның көркін келтіріп, кештің рухани шуағын арттыра түсті.
«Өлең – адамның ішкі әлеміндегі тынышсыздықтың үні. Егер бір шумақ өлең бір жанды жұбатса, менің миссиям орындалды», – деген Қуат Қайранбаевтың сөзі кештің рухани өзегіне айналды. Әдеби кеш аясында тұңғыш рет мектеп оқушылары мен колледж студенттері арасында облыстық «Қуат Қайранбаев оқулары» байқауы ұйымдастырылды.
Ақынның шығармашылығын дәріптеу, жастарды поэзияға баулу, сөз қадірін сезінуге тәрбиелеу мақсатында өткізілген сайысқа облысымыздан 64 оқушы қатысып, сынға түсті. «Өмір сүргім келеді, өлеңменен жұптаса» – ақын өлеңдерін жатқа оқу; «Ғазал-ғұмыр» – ақын шығармасына арналған буктрейлер әзірлеу; «Ақын шығармашылығының ізімен» – шығармашылық интерпретация; «Сезімнің тереңінен лағыл терем» – эссе жазу секілді төрт бағытта өткен байқауда қазылар алқасы қатысушылардың шеберлігі мен терең сезімін жоғары бағалады. Жеңімпаздарға ақшалай сыйлықтар мен Қуат Қайранбаевтың кітаптары табысталды.
Нұрәли Ернарұлы, Талдықорған қаласындағы М.Арын атындағы №24 лицейінің 8 сынып оқушысы:
– Мен үшін Қуат Қайранбаев оқулары – жаңа бастама. Өлеңге жақындай түстім, әдебиетке деген сүйіспеншілігім артты. Осындай мүмкіндік жасаған ұстазым Индира Болатқызы мен анама ерекше алғысымды білдіремін. Сондай-ақ, ұйымдастырушыларға алғысым шексіз, – дейді.
Ермұхамбет Дәулетжан, Панфилов ауданы, Надек орта мектебінің 9-сынып оқушысы:
– Облыстық Қуат Қайранбаев оқуларына қатысып, жүлделі орын алғаныма өте қуаныштымын. Бұл байқау менің өмірімдегі ең үлкен шабыт беретін сәт болды. Ақынның өлеңдерін оқи отырып, өмірдің әсемдігін, адамның жан тереңін түсінуге тырыстым. Осы байқауға дайындаған ұстазым Мақпал Қашқынбаеваға алғысымды білдіремін, – дейді.
Мақпал Қашқынбаева, Надек орта мектебінің қазақ тілі мен әдебиеті пәнінің мұғалімі:
– Облыстық Қуат Қайранбаев оқуларына ауданымыздан 9 оқушы қатысып, бәрі де жүлделі орыннан көрінді. Бұл – еңбектің, ынтаның және рухани тәрбиенің нәтижесі. Ал Ермұхамбет баламыздың бас жүлде иеленуі бүкіл ұжымның қуанышы. Әдебиетке ынтық балалардың шығар биігі әлі алда, – дейді.
Оның сөзі – ұстаздық еңбектің, шәкіртке деген сенім мен махаббаттың көрінісі. Расында да өлеңге баулып, рухани дүниенің кілтін ашып берген мұғалім еңбегі – кез келген марапаттан биік.
Әдеби кеште ақынның ұлы Сырым Қуатұлы сахна төріне шығып, жылы лебізін білдірді.
– Бұл кеш мен үшін ерекше мәнге ие. Әкемнің өлеңдерін халықтың жүрекпен қабылдап, оның шығармашылығын құрметтеуі – біздің отбасымыз үшін үлкен қуаныш. Әкемнің өнерін бағалап, осындай рухани кешке жиналған барша жандарға алғыс білдіремін. Сонымен қатар, осы шараға өз жұмыс орным «Qazaqstan Catering Solutions» компаниясының қолдау білдіргені мен үшін ерекше мәртебе. Мәдениет пен руханиятқа үлес қосу – әр ұжым үшін абырой, – деген ол мектеп кезінде әкесіне арнаған өлеңін оқып берді. Өлең жолдары қарапайым болғанымен перзенттің жүрегінен шыққан жылы сезімді айқын сездірді.
Сондай-ақ, Сырым әкесіне көліктің кілтін табыс етіп, оның еңбегіне деген құрметін осылайша білдірді. Бұл сәтті көрермен де ыстық ықыласпен қарсы алды.
Поэзияға деген сүйіспеншілікті арттырған, жас ұрпақты сөз әлеміне жетелеген бұл рухани шара концерттік бағдарламаға ұласты.
«Көңіл қоңырауы» мен «Қуат Қайранбаев оқулары» – тек бір күндік шара емес, ұлт руханиятының биік белесі. Бұл кеш арқылы жастар поэзияның шынайы қуатын сезінді, ал Қуат Қайранбаевтың жыр әлемі жас буынның жүрегіне жаңа леп сыйлады.
Сарби ӘЙТЕНОВА
