Талдықорған – Қалбатау – Өскемен республикалық тас- жолын қайта жаңарту аяқталды.
«ҚазАвтоЖол» ҰК» АҚ баспасөз қызметінің мәліметінше, ұзындығы 314 шақырым учаскедегі жол төсеміне күрделі жөндеу жұмыстары жүргізілген. Қауіпсіздікті қамтамасыз ету мақсатында жол бойына ақпараттық таблолар, жарықтандыру діңгектері және бейнебақылау жүйелері бар заманауи бақылау аркалары орнатылған. Сонымен бірге қорғаныс торлы қоршаулар, термопластикалық белгілер және жаңа жол белгілері қойылған. 253-254 шақырымдық учаскеде (3-ші бөлімше елді мекені мен Талдықорғанға кіру арасында) сыртқы жарықтандыру тіректері бар.
Бұған қоса, облыстың республикалық маңызы бар бірқатар автокөлік жол учаскелерінде қосымша жарық тіректерін орнату жұмыстары жалғасуда. Олар Сарыөзек – Көктал бағыты бойынша Сарыөзек ауылының ішінде, Қызылжар, Қаспан, Қарымсақ, Алтынемел ауылдарының қиылыстарында, сондай-ақ, Қоңырөлең және Ақжазық ауылдарының бойында, ал Талдықорған – Үшарал бағыты бойынша Абай, Қойлық, Бақалы, Қарабөгет және Әлемді ауылдарының қиылыстарында, Қонаев – Талдықорған бағыты бойынша Арқарлы асуының маңында орналасқан.
Орнатылған тіректерді іске қосу, жөндеу жұмыстары жүргізілуде. Барлық іс-шара желтоқсан айының ортасына дейін аяқталады деп жоспарланып отыр. Жарықтандыру жүйелерін, бейнебақылау құралдарын, ақпараттық таблоларды және инфрақұрылымның басқа да элементтерін орнату жол қозғалысы қауіпсіздігін арттыруға, жол-көлік оқиғаларының санын азайтуға және жүргізушілер мен жолаушылар үшін барынша жайлы жағдай жасауға бағытталған.
Жаңартылған жол аймақтағы көлік байланысын жақсартуға және облыс қалалары арасындағы көлік қызметінің сапасын арттыруға ықпал ететін болады.
А. ЫБЫРАЙ
