Мемлекетке қызмет ету – ең құрметті әрі жауапты міндет. Мемлекеттік қызметшілер әрдайым әділдік, ашықтық, сыпайылық және әдеп нормасын басшылыққа алуы тиіс. Әдеп кодексінің қоғамның мемлекеттік органдарға деген сенімін нығайтуға, мемлекеттік қызметте өзара қарым-қатынастың жоғары мәдениетін және парасаттылық танымын қалыптастыруға, сондай-ақ, мемлекеттік қызметшілердің әдепсіз мінез-құлық жағдайларының алдын алуға бағытталғаны сөзсіз. Әрбір қызметкердің сөзі, іс-әрекеті, жүріс-тұрысы қоғамның мемлекеттік органдарға деген сеніміне тікелей әсер етеді.
Бұл ретте мемлекеттік қызметшілердің әдептілік қағидаттары мен стандарттарын және мінез-құлқын реттейтін негізгі құжат – бұл Қазақстан Республикасы мемлекеттік қызметшілерінің Әдеп кодексі. Кодексте мемлекеттік қызметшінің азаматтармен қарым-қатынасы, әріптестерімен өзара іс-қимылы, сондай-ақ қызметтік міндеттерін орындау барысында ұстануға тиіс әдеп нормалары нақты белгіленген.
Мемлекеттік қызметшінің жеке мінез-құлқы да қоғамға теріс пікір тудырмауы тиіс. Ол әрқашан өз лауазымына сай бейне қалыптастырып, жоғары моральдық жауапкершілік танытуы керек.
Кодексте мемлекеттік қызметшілерге, қызметтік міндеттерін орындауға байланысты жағдайларды қоспағанда, ойын мекемелеріне барудан тартыну жөнінде қатаң талап бекітілген.
Қазақстан Республикасы Мемлекеттік қызмет істері агенттігінің Жетісу облысы бойынша департаменті өз жұмысы барысында облыстағы мемлекеттік органдарда кездесулер өткізіп, Әдеп кодексінің талаптарын түсіндіру, мемлекеттік қызметшілердің кәсіби қызметінің тиімділігі мен сапасын арттыру, олардың моральдық-адамгершілік қасиеттерін қалыптастыру және нығайту бойынша жұмыстар жүргізіп келеді.
Сонымен қатар, қызметтен тыс уақытта жалпыға бірдей моральдық-этикалық нормаларды сақтау мен мінез-құлық стандарттарына қатысты да түсіндірмелер береді.
Осы жұмыстардың аясында Жетісу облысында жергілікті атқарушы органдардың мемлекеттік қызмет заңнамасының сақталуы, Әдеп кодексінің нормаларын бұзу жағдайларын болдырмау және бұзушылықтардың алдын алу мақсатында семинар-конференциялар өткізіледі.
Сондай-ақ, кездесу барысында мемлекеттік қызметшілердің тәртіптік жауапкершілігі туралы мәселелер талқыланды. Тәртіптік жауапкершіліктің мақсаты – жазалау емес, керісінше, басқа мемлекеттік қызметшілер тарапынан қызметтік әдеп нормаларын бұзушылықтардың жолын кесу не оларды болдырмау жөнінде өзге де шаралар қабылдау.
Қ. Манап,
Қазақстан Республикасы Мемлекеттік қызмет істері агенттігінің
Жетісу облысы бойынша департаментінің басшысы,
Әдеп жөніндегі кеңестің төрағасы
