Ұрпақтар арасындағы үндестік, алдыңғы толқын мен кейінгі толқынның сабақтастығын паш ететін шапағатты шара «Жанұя» отбасын қолдау және белсенді ұзақ өмір сүру орталығында» өтті. Іс-шараның басты ерекшелігі мерекені орталық қызметкерлері мен қызмет алушылар ұйымдастырып, ақ сақалды аталар мен ақ жаулықты аналарға мерекелік кеш ұсынды.
«Қартын сыйлаған ел – қадірін білген ел» атты мерекелік жиында алғашқы сөзді Сарқан ауданының жұмыспен қамту және әлеуметтік бағдарламалар бөлімінің басшысы Бекжан Асылханов алып, ел экономикасын жақсарту үшін табандарынан тозып еңбек еткен қарияларды мерекемен құттықтап, ақ тілегін арнады.
Мерекелік кеш барысында ескі де есті әуендерді әуелеткен орталықтың қызмет алушылары «Қара жорға», «Қамажай» билерін билеп, көрермендердің көңілін көтерді. Сонымен қатар, орталыққа келуші қарттардың қолөнер туындылары көпшілік назарына ұсынылды. Асқан шеберлікпен, зор махаббатпен дайындалған бұйымдар келушілердің таңданысын тудырды. Көпшілік алдында сөз алған Исатай, Нұрсұлу, Мағрифа, Еркінгүл сынды тұрғындар орталық басшысы Әсел Сәбитжанқызының жүйелі жұмысына ризашылық білдіріп, физикалық терапия нұсқаушысы Фархат Мұратхановқа, Ботагөз Дүйсенбекке, Гүлсезім Тұрарға, Арайлым Рахимоваға және өзге де қызметкерлерге ерекше алғыс айтты.
Келесі кезекте аудандық жұмыспен қамту және әлеуметтік бағдарламалар бөлімінің басшысы Бекжан Досымбекұлы мен «Жанұя» отбасын қолдау және белсенді ұзақ өмір сүру орталығы» коммуналдық мемлекеттік мекемесінің директоры Әсел Сабитжанқызы орталықтағы қызмет алушылар арасында белсене атсалысып жүрген ардагерлерді марапаттап, мерейлерін өсірді. Мерекелік шараның соңында қонақтар арнайы жайылған дастарқаннан дәм татты.
Биыл жұмысын бастаған «Белсенді ұзақ өмір сүру» орталығында білікті мамандар қызмет алушыларға сан түрлі дене жаттығуын жасатады. Ондағы велотренажер, жүгіру жолы, массаж креслосы, тұзды бөлме қарттардың денсаулықтарын түзеуге мүмкіндік береді. Орталықта ардагерлердің оюланған бөстек тігіп, сурет салып, би билеп, шахмат, теннис ойнап уақыттарын тиімді өткізуге барлық жағдай жасалған. Қарттарымыз уақыттарын белсенді, мәнді, тиімді өткізуде.
(
Жақсылық ИГІМАН
