Қазақстан Президенті Қасым-Жомарт Тоқаевтың Ресейге мемлекеттік сапары қарсаңында Мәскеу қаласында Қазақстан және Ресейдің мемлекеттік тулары ілінді.
Қала орталығына қарай бағытталған Ленин даңғылы бойымен екі елдің тулары жұптасып ілінді. Бұл – Ресей мен Қазақстан арасындағы достық пен ынтымақтастықтың белгісі ретінде ұйымдастырылған сәндік безендіру.
Тоқаевтың Ресейге сапары 11-12 қараша күндері өтеді. Сапар барысында Қазақстан басшысы Ресей Федерациясының Президенті Владимир Путинмен келіссөздер жүргізеді деп жоспарланған.
Кремльдің хабарлауынша, екі ел көшбасшылары алдағы кездесуде екіжақты ынтымақтастық мәселелерін, сондай-ақ өңірлік және жаһандық күн тәртібіндегі өзекті тақырыптарды талқылайды.
Бұдан бөлек, мемлекет басшылары бейнебайланыс режимінде Ресей мен Қазақстан арасындағы XXI өңіраралық ынтымақтастық форумының қатысушыларына арнап сөз сөйлейді. Форум биыл Қазақстанның Орал қаласында өтеді.
