Денсаулық сақтау министрі Ақмарал Әлназарова Астана-Алматы бағытындағы ұшақта өзін жайсыз сезінген жолаушыға шұғыл медициналық көмек көрсетті, деп хабарлайды 7-su.kz ақпарттық порталы kaz.nur.kz сайтына сілтеме жасап.
Threads әлеуметтік желісінде куәгердің жазуына қарағанда, рейс ұшу-қону жолағына бет алған сәтте бір жолаушының жағдайы кенет нашарлаған. Орындықтан үрейлі дауыс естіліп, стюардессадан дәрігер шақырылған.
Куәгердің айтуынша, бір әйел дереу көмекке келіп, жолаушының жағдайын бағалап, қан қысымын өлшеп, алғашқы медициналық көмек көрсетуге кіріскен.
«Қан қысымы жоғары екен. Стюардессалар майлық пен қалта әкеліп көмектесіп жатты. Содан кейін олар әйелден: “Сіз дәрігерсіз бе, әлде бірге ұшып бара жатқан серіктесісіз бе?” деп сұрады. Ол жай ғана “дәрігермін” деп жауап беріп, жұмысын жалғастырды», – деп жазады автор.
Жолаушыға дәрі, су, шай беріліп, жағдайы бақылауға алынған. Ұшуды жалғастыру мүмкіндігі сұралғанда, ол «иә» деп жауап берген.
Кейін көмек көрсеткен адамның Денсаулық сақтау министрі Ақмарал Шәріпбайқызы Әлназарова екені белгілі болды.
Осы оқиғаға қатысты түсініктеме сұрап министрлікке жүгінгенде, ведомство видеодағы жағдайдың шын екенін растады.
