Денсаулық сақтау министрі Ақмарал Әлназароваға Республикалық трансплантаттауды үйлестіру орталығы елдегі ағза донорлығын дамытудың оң динамикасын таныстырды, – деп хабарлайды 7-su.kz ақпарттық порталы.
Орталық басшысы Айдар Сейітқазиновтың айтуынша, қайтыс болғаннан кейінгі донорлардан жасалған трансплантация көлемі былтырғы кезеңмен салыстырғанда 2,6 есе өскен. 2025 жылдың 10 айында ағымдағы донорлар саны да айтарлықтай ұлғайып, 6-дан 16-ға жетті. Сонымен қатар eGov.kz порталында өз еркімен келісім білдірген азаматтардың үлесі 27%-ға артты, ал келісім көрсеткіші 63%-ға көтерілді.
2024 жылмен салыстырғанда қайтыс болғаннан кейінгі донорлықтан жасалатын операциялар екі есеге өсті, ал тірі донорлардан жасалатын трансплантация 2,5%-ға жоғарылады. Мұндай оң өзгерістерге елде трансплантация инфрақұрылымының кеңейтілуі әсер етті: былтыр 7 орталық жұмыс істесе, биыл олардың саны 11-ге жетті.
Қазіргі таңда Қазақстанда 4521 адам ағза алмастыруды күтуде, күту парағындағы пациенттер арасындағы өлім-жітім 4,6%-ға азайды. Донорлық белсенділігі ең жоғары өңірлер ретінде Алматы мен Астана қалалары, Павлодар, Шығыс Қазақстан, Солтүстік Қазақстан, Алматы, Жамбыл және Батыс Қазақстан облыстары аталды.
Сала әрі қарай дамуға дайындалып жатыр: бірқатар салалық бұйрықтарға өзгерістер енгізілді, мамандарды Қазақстанда және шетелде оқыту жалғасуда, Испания, Түркия және Беларусьпен халықаралық серіктестік кеңеюде.
Кеңес қорытындысында Ақмарал Әлназарова трансплантаттау бойынша бірнеше өңірде жүйелі мониторинг жүргізуді, шұғыл тасымалдау тетіктерін күшейтуді, цифрлық шешімдерді енгізуді, сондай-ақ қайтыс болғаннан кейінгі донорлықты насихаттау бойынша ақпараттық-түсіндіру жұмыстарын жандандыруды тапсырды.
