Жетісу облысында қоғамдық тәртіпті қамтамасыз ету, құқық бұзушылықтың алдын алу және тұрғындардың қауіпсіздігін нығайту мақсатында кешенді жұмыс жүйелі түрде жүргізіліп келеді. Қоғамдағы тұрақтылық пен тыныштық – біз үшін басты басымдық, сондықтан жергілікті полиция қызметінің күнделікті қызметі алдын алу шараларының тиімділігіне, тұрғындармен тұрақты байланыс орнатуға және қоғамдық орындардағы тәртіпті бақылауға бағытталған.
Облыс аумағында учаскелік инспекторлардың жұмысы күшейтіліп, халықпен жеке қабылдаулар, түсіндіру жұмыстары және профилактикалық кездесулер жиі өткізіледі. Әрбір ауыл мен қаладағы учаскелік пункттердің қолжетімділігі арттырылып, азаматтардың өтініштері мен шағымдарына уақытылы жауап беру ерекше назарда.
Қылмыстың алдын алудағы маңызды бағыттардың бірі – кәмелетке толмағандар арасындағы құқық бұзушылықты болдырмау. Ювеналды полиция жасөспірімдердің түнгі уақытта бейберекет жүруіне жол бермеу, оларды зиянды ортадан қорғау және қауіпсіз демалыс жағдайын жасау бағытында жүйелі рейдтер ұйымдастырып отырады. Білім ұйымдарымен бірлескен түсіндіру жұмыстары, алдын алу сабақтары мен ата-аналарға арналған кездесулер де үздіксіз жүргізілуде.
Сонымен қатар, отбасылық-тұрмыстық зорлық-зомбылықтың алдын алу – біздің негізгі бағыттарымыздың бірі. Бұл мәселеде қауіп төндіретін жағдайларды ерте анықтау, тұрмыстық жанжалдарға жол бермеу және жәбірленушілерді қорғау бойынша нақты шаралар қабылдануда. Қажет болған жағдайда қорғау нұсқамалары енгізіліп, құқықтық және психологиялық көмек көрсетіледі.
Облыстың жолдарында қауіпсіздікті қамтамасыз ету үшін жол-патрульдік полиция қызметінің жұмысы да күшейтілді. Жол-көлік оқиғаларының алдын алу мақсатында республикалық және өңірлік деңгейдегі акциялар, рейдтер, жедел-алдын алу іс-шаралары тұрақты түрде өткізіліп келеді. Әсіресе мас күйінде көлік басқару, жылдамдықты асыру және қарсы бағытқа шығу сияқты заңбұзушылықтарға қатысты нөлдік төзім принципі қолданылуда. Сонымен қатар автокөліктердің техникалық жағдайын бақылау, халық арасындағы қауіпсіздік мәдениетін қалыптастыру да басты назарда.
Қоғамдық орындарда құқық бұзушылықтың алдын алу мақсатында бейнебақылау жүйесі кеңейтілуде. Облыс орталығында және аудандарда жаңа камералар орнатылып, олардың жұмысы жедел басқару орталығында тәулік бойы бақыланады. Бұл құқық бұзушылықтарды дер кезінде анықтауға, заңға қайшы әрекеттердің алдын алуға және жедел әрекет етуге мүмкіндік береді. Патрульдік бағыттар көбейтіліп, халық көп шоғырланатын орындарда полицияның көрінуі арттырылуда.
Тұрғындармен кері байланыс орнату – полиция қызметінің басты қағидаты. Әрбір азаматтың қауіпсіздік мәселелерін тыңдап, ұсыныстары мен өтініштерін назарға алу, қоғамдық кеңестермен және жергілікті атқарушы органдармен бірлесе жұмыс жүргізу – қоғамдық тәртіпті нығайтудың маңызды бөлімі. Біз қоғамдық қауіпсіздікті сақтау – тек полицияның ғана емес, бүкіл қоғамның ортақ жауапкершілігі екенін жақсы түсінеміз. Сондықтан тұрғындарды құқықтық мәдениетті арттыруға, сақтық шараларын ұстануға және күдікті жағдайларды дер кезінде хабарлауға шақырамыз.
Жетісу облысында құқық бұзушылықтың алдын алу бағытындағы жұмыстар алдағы уақытта да жалғасын табады. Қоғамның тыныштығын қорғау, әрбір азаматтың қауіпсіз өмір сүруіне жағдай жасау – біздің негізгі міндетіміз әрі жауапты қызметіміз. Ортақ күш-жігер мен бірлескен жұмыс нәтижесінде өңіріміздегі тұрақтылық пен қоғамдық тәртіп одан әрі нығая түсетініне сенімдімін.
Қайсар Мұхметов ,
Жетісу облысының ПД Жергілікті полиция қызметінің бастығы
