Елді алға сүйрейтін – дүркіреп тұрған реформалар да емес, сырттан келген дайын шешімдер де емес, өз жерінің өркендеуіне үлес қосуды азаматтық борышы санайтын қарапайым еңбекшінің табандылығы.
Елдің ертеңін қалыптастыратын күш те, жердің келешегін жаңғыртатын қуат та дәл осындай адамдардың қолында. Сондай жанның бірі – Екпінді ауылының тумасы, тракторшы-механизатор Ерзат Мұратқалиұлы.
Үйдегі үш баланың кенжесі болса да, «кенжемін» деп еркелеген емес. Нағыз қазақ ауылына тән тәрбиемен өскен ол ес білгеннен ата-анасының жанында жүріп мал жайғады, жер жыртып, шөп шабуға көмектесті. 2008 жылы «Хильниченко и К» шаруа қожалығына қабылданған күннен техниканың да тілін тез меңгерді. Трактор мен комбайнның «мінезін» алыстан танитын деңгейге жетті. Содан бері 18 жыл бойы бір маусымда алқаптан сырт қалған емес. Көктемгі науқан, жазғы шабындық, күзгі жиын-терін – бәрінде таңғы салқынмен бірге жұмысқа кірісіп, қараңғы түскенше тынымсыз еңбек етеді.
Екі жыл бұрын отау құрып, әке атанған оның өмірінде тағы бір жаңа жауапкершілік пайда болды. Енді ол тек шаруашылықтың ғана емес, отбасының да қорғаны. Жұмыстан шаршаған күні баласының күлкісі, шаңырақтың жылуы оның бойына жаңа күш сыйлайды.
Ескелді ауданының ауыл шаруашылығы соңғы жылдары қарқын алып келеді. Бұл жетістік – кабинетте қолдан жасалған есептің емес, Ерзат секілді қарапайым адамдардың еңбегінің жемісі. Алқапта жүрген әр күн, әр жиналған бау, әр дән – елге қосылған үлес.
Ол – өзін «ерлік істеп жатырмын» деп есептемейтін, бірақ шын мәнінде елдің азығын, ауылдың ырысын қамтамасыз етіп жүрген азамат. Адамдардың назарында болмауы мүмкін, бірақ ауылдың әр таба нанында, әр қап астығында оның маңдай тері жатыр.
Нағыз еңбек адамы – дабырасыз, дау-жанжалсыз, үнсіз істейтін жандар десек, Ерзат Мұратқалиұлы дәл сондай азамат. Осындай адамдар барда ауыл өмірі ешқашан өзегін жоғалтпайды, елдің де ырысы кемімейді.
Сарби ӘЙТЕНОВА
