Жаңа жыл – тек мереке ғана емес, еліміздегі баға мен тарифтердің қайта қаралатын кезеңі. 2026 жылдан бастап Үкімет бірқатар тауар мен қызметтердің құнын өзгертпек. Кейбір өзгерістер қалтаға салмақ салғанымен, зейнетақы мен жәрдемақының өсуі халыққа демеу болмақ, – деп хабарлайды 7-su.kz ақпараттық порталы Todayinfo сайтына сілтеме жасап.
Мамандардың айтуынша, бағаның өсуіне инфляциялық процестер мен инфрақұрылымды жаңарту қажеттілігі себеп болып отыр. Сонымен, қаңтар айынан бастап бізді қандай өзгерістер күтіп тұр?
Коммуналдық қызметтер және тарифтер
«Инвестиция орнына тариф» бағдарламасы аясында еліміздегі тозған желілерді жаңарту жұмыстары жалғасады. Соның салдарынан жылу, су және жарық бағасының өсуі байқалады.
- Электр энергиясы мен жылу: Аймақтарға байланысты орта есеппен 10-15% аралығында қымбаттайды.
- Мақсат: Жылу электр орталықтарындағы (ЖЭО) апаттардың алдын алу және сапалы қызмет көрсету.
Акциздер мен жағымсыз әдеттер құны
Дәстүрлі түрде зиянды әдеттерге салынатын салық мөлшері артады. Темекі өнімдерінің акциз мөлшерлемесі жоспарлы түрде өсетіндіктен, темекі қорабының ең төменгі бөлшек сауда бағасы тағы да жоғарылайды. Сондай-ақ алкоголь мен жанармай акциздерінің өсуі тасымалдау шығындарын арттырып, өзге тауарлардың бағасына жанама әсер етуі мүмкін.
Көлік және азық-түлік
- Теміржол билеттері: Вагондар паркін жаңарту мақсатында билет құны 7-10% аралығында өседі.
- Азық-түлік: Маусымдық факторларға байланысты көкөністер мен сүт өнімдерінің бағасында құбылу байқалады.
Әлеуметтік қолдау: Не өседі?
Бағаның өсуімен қатар, мемлекет әлеуметтік міндеттемелерін де арттырады. 2026 жылдың 1 қаңтарынан бастап ынтымақты және базалық зейнетақы индекстеледі. Сонымен қатар мүгедектікке, асыраушысынан айырылуға және бала күтіміне байланысты жәрдемақылар ұлғаяды. Айта кетерлігі, Айлық есептік көрсеткіштің (АЕК) өсуі тек жәрдемақыны ғана емес, айыппұлдар мен салықтарды да көбейтеді.
Сарапшылар тұрғындарға отбасылық бюджетті тиімді жоспарлап, коммуналдық қызметтерді үнемдеуге кеңес береді.
