Алакөл ауданында азық-түлік қауіпсіздігін қамтамасыз етуде маңызды рөл атқаратын асыл тұқымды мал шаруашылығы қарқынды дамып келеді. Бүгінде бұл бағытта 15 шаруашылық айналысады. Олар ірі және ұсақ мал, сондай-ақ жоғары сапалы асыл тұқымды жылқы санын көбейтіп, өсіруде.
– Асыл тұқымды ірі қара мал басының үлесі 23 пайыз немесе 18 880 басты құрайды. Ауданда етті тұқымды Ақбас, Әулиекөл, Герефорд, Ангус, Қалмақ және сүтті тұқымды – Алатау, Симментал, Голштин сиырлары өсіріледі. Сонымен бірге қой, жылқы шаруашылығы тұрақты дамып келеді. Негізінен қазақтың жіңішке жүнді асыл тұқымды қойларының үлесі 33 пайыз (75 650 бас), ал асыл тұқымды – Жабы, Адай, Мұғалжар жылқысының үлесі 16,4 пайызға (5870 бас) жетеді, – дейді Алакөл ауданының әкімі Алмас Әбдінов.
Өңірде нарықты етпен қамтамасыз ету үшін жалпы қуаттылығы 7100 ірі қараға арналған 6 мал бордақылау алаңы жұмыс істейді. Қазіргі уақытта бұл жерде 4270 бас мал жемделуде, оның ішінде «Әкімбеков», «Мұрат», «Айманбетов», «Ұшқын», «Жазылбеков и К» шаруашылықтарында, «Қайыңды» ЖШС-де мал басы бағылуда.
Облыс әкімдігінің мәліметінше, жалпы облыста былтырғы 10 айдың қорытындысы бойынша мал басы 2,6 миллионға жеткен. Ет өндірісі 79,6 мың тоннаны құрайды, бұл жоспардың 103,5 пайызына сәйкес келеді, ал сүт – 193,7 мың тонна немесе 104 пайыз. Өңірде 26,1 мың басқа арналған 71 бордақылау алаңы және 8,3 мың басқа арналған 34 тауарлы-сүт фермасы жұмыс істейді. Олардың үшеуі биыл 1190 басқа кеңейтілді.
Айта кетейік, мемлекет мал шаруашылығына айтарлықтай қолдау көрсетуде. Субсидиялар асыл тұқымды дамытуға, өнімділікті арттыруға, жемшөпті арзандатуға және мал сатып алуға беріледі. Асыл тұқымды сиырларды сатып алу кезінде мемлекеттік қолдау мөлшері бір басқа 150-300 мың теңгені құрайды.
Мал, техника алу және айналым қаражатын толықтыру үшін жылдық 5-6% жеңілдікті несиелер gosagro.kz. порталы арқылы қолжетімді.
Аудан әкімінің айтуынша, асыл тұқымды мал шаруашылығын дамыту – ауыл шаруашылығының тұрақтылығын және ішкі, сыртқы нарықтардағы өңірлік өнімнің бәсекеге қабілеттілігін қамтамасыз ететін стратегиялық бағыт.
Айгүл БАЙБОСЫНОВА
Алакөл ауданы
