«Ұлттық қор – балаларға» бағдарламасы аясында қазақстандық балалардың жеке шоттарына кезекті қаржылық аударымдар жүргізіледі. Ұлттық банктің мәліметінше, биылғы төлемдерді жүзеге асырудың техникалық процесі қаңтар айының соңына жоспарланған, – деп хабарлайды 7-su.kz ақпараттық порталы.
1 ақпан демалыс күніне сәйкес келгендіктен, қаражатты аудару 30 қаңтар күні жүзеге асырылады. Алайда ата-аналар мен заңды өкілдер қаржыны шоттарынан 31 қаңтар күні түстен кейін немесе 1 ақпан таңертең көре алады.
Биылғы төлем мөлшері алдын ала бекітілген. Әр баланың шотына шамамен 130 АҚШ доллары аударылады. Қазіргі айырбас бағамымен есептегенде, бұл 65 мың теңгеден асады.
Айта кетейік, «Ұлттық қор – балаларға» бағдарламасы биыл үшінші жыл қатарынан іске асырылып отыр. Алғашқы жылы балалардың шотына шамамен 100 доллар, екінші жылы 130 долларға жуық қаражат түскен. Биылғы төлемді қоса есептегенде, үш жыл ішінде бір баланың жинағы 360 доллардан асады. Инвестициялық табысты ескерген жағдайда, бұл сома шамамен 370 долларға дейін жетуі мүмкін.
Бағдарлама шарттарына сәйкес, балалар кәмелет жасына толғанға дейін бұл қаражат пайдаланылмайды және инвестицияланады. Соның нәтижесінде жинақ көлемі жыл сайын артып отырады.
