Бикен Римова атындағы академиялық драма театры өзінің кезекті гастрольдік сапарын Жетісудың аяулы перзенті, Социалистік Еңбек Ері Зылиха Тамшыбаеваның 90 жылдық мерейтойына арнады. Өнер ұжымы аңыз адамның есімін иеленген ауылда болып, халыққа рухани тарту жасады, – деп хабарлайды 7-su.kz ақпараттық порталы.
Мерейтой аясында сахналанған Қ.Шаңғытбаев пен Қ.Байсейітовтың «Беу, қыздар-ай!» музыкалық комедиясы ауыл тұрғындары үшін нағыз мерекеге айналды. Былтыр «Жұмысшы мамандықтар жылында» тұсауы кесілген бұл туынды биыл Зылиха Тамшыбаеваның мерейтойына орай жаңа мазмұн мен терең мәнге ие болды.
«Зылиха Тамшыбаева – еңбек пен қажырлылықтың символы. Оның 90 жылдығында өзі негізін қалаған ауылда өнер көрсету – біз үшін үлкен мәртебе әрі перзенттік парыз», – деп атап өтті театр ұжымы.
Қойылымның режиссері Ержан Қауланов туынды арқылы тек жастардың махаббатын емес, адал еңбектің қоғамдағы орнын шебер жеткізе білді. Көркемдік шешім: Қоюшы-суретші Д.Қыдырқожа мен костюм суретшісі А.Тоқай жасаған бейнелер ауыл сахнасын көркемдік деңгейге көтерді. Ал композитор А.Азанбайдың өңдеуіндегі әуендер қойылымның рухын асқақтатып, көрерменді ерекше сезімге бөледі.
Зылиха Тамшыбаеваның өмір жолы мен еңбекке деген адалдығы қойылымның негізгі идеясымен үндесіп жатыр. Театр ұжымы бұл сапар арқылы еңбек адамын ұлықтау мен ұрпақтар сабақтастығын нығайтуды көздеді.
Ауыл ақсақалдары мен тұрғындары театр ұжымына дән риза болып, Зылиха анамыздың мерейтойын осындай жоғары деңгейдегі өнермен атап өткендері үшін алғыстарын жаудырды.
