Көктем әсемдік пен нәзіктік салтанат құратын мезгіл. Осы бір шуақты мереке қарсаңында біз есімі ерекше, атына заты сай, болмысы гүлдей нәзік Тюльпан Рақымбекованы оқырманға таныстырмақпыз. Иә, қателеспедіңіз, ол – көктемнің көрігі саналатын қызғалдақтың атымен аталған ару. Есімі секілді өзі де айналасына жылулық пен сұлулық сыйлаған нәзік жан.
– Есімімді «Тюльпан» деп әжем қойған екен, – деп кейіпкеріміз әңгімесін бастады.Өкінішке қарай, Тюльпан әжесінің жүзін көріп үлгермеген, ол кісі немересі тым кішкентай кезде өмірден өтіпті. Бірақ бойжеткен үшін оның есімі әжесінен қалған ең қымбат әрі құнды естелік. «Есімім аталған әр сәт әжемнің ақ батасындай, ақ тілегіндей сезіледі», – дейді Тюльпан.
Негізінде, ата-анасы әпкесі Жанардың есіміне ұйқастырып, «Жадыра» деп қоймақ болған. Бірақ әжесі: «Тюльпан» деп қойыңдаршы» деп табандап тұрып алған. Көреген қария бұл есімнің астарында үлкен мән бар екенін, немересінің нәзік, сұлу болғанын әрі ешкімде жоқ ерекше есімді алып жүргенін қалаған.
– Мамыр айының 14-і күні, таңғы сағат 5.20-да дүние келдім. Мамыр айы табиғаттың ерекше құлпырып, айнала жасыл желекке оранып, гүлдер құлпырып шығатын мезгіл ғой. Сол сәтті әжем кейін ерекше тебіреніспен еске алыпты. «Тюльпанның дәл ашылған шағын көрдім. Қызым да сол гүлдей болып өмірге келді, – деп айтқан екен. Осылай, таңда ашылған «тюльпан» менің есіміме айналды, – дейді нәзік жан.
Кейіпкеріміз «есімім басқа болғанда болмысым да бөлек бола ма?» деп ойлайтынын айтады. «Жаным мен тәнімнің нәзіктігі, сұлулыққа құштарлығым мен мінезім, көктемді асыға күтуім осы есіміммен тікелей байланысты деп ойлаймын».
Ерекше есім иесі балалық шағында атына қатысты қызықты оқиға көп болғанын жасырмады. «Балабақшада тәрбиешім әр көктем сайын «Қазір гүлдер туралы тақырып өтеміз. Ал бізде тірі Тюльпан бар ғой!» – деп мені ортаға шығаратын. Ал мен болсам ұялып, бетім қызарып тұратынмын. Көпшілік алғаш естігенде таңырқап жатады. «Тюльпан?» деп қайталап сұрайды. Кейде тіпті, «Қазақсың ба, әлде орыссың ба?» дейтіндер де кездеседі. Мен ондайда жымиып тұрып: «Мен – қазақтың қызымын. Ата-анам да, ата-бабам да қазақ», – деп жауап беремін. Есіміме қарап ұлтымды болжағысы келетіндерге ренжімеймін. Керісінше, ерекше болғаны үшін қуанамын. Себебі ол мені көпшіліктен даралап тұратындай. Алайда, мен үшін ең бастысы – есімімнің әсем естілуі немесе – өзгеше болуы емес. Ең маңыздысы – менің бір әулеттің ақ тілегі және әжемнің ыстық ықыласымен қойылған ныспымның иесі екендігім.
Есімі де, болмысы да ерекше асыл ана, ибалы келінге «ғұмырыңыз әдемі өрілсін», – деп ата басылым атынан ақ тілек арнаймыз.
Мақпал ӘДІЛХАНҚЫЗЫ
