АҚШ Президенті Дональд Трамп Ресей мұнайына қарсы қолданыстағы кейбір шектеулерді уақытша алып тастайтынын мәлімдеді. Бұл шешім Таяу Шығыстағы қарулы қақтығыстар салдарынан әлемдік нарықта мұнай бағасының күрт өсуіне байланысты қабылданып отыр, – деп хабарлайды 7-su.kz ақпараттық порталы democrat.kz сайтына сілтеме жасап.
Ақ үй басшысының айтуынша, санкцияларды жеңілдетудегі негізгі мақсат – жаһандық энергия тасымалдаушылар нарығын тұрақтандыру және бағаны төмендету. Трамп аталмыш қадамның тек уақытша екенін, жағдай реттелгенге дейін күшінде болатынын атап өтті. Егер нарықтағы ахуал жақсармаса, санкциялар қайта енгізілуі де мүмкін. Айта кетейік, АҚШ Қаржы министрлігі бұған дейін Үндістанға теңізде тұрып қалған ресейлік мұнай партияларын сатып алуға 30 күндік рұқсат берген болатын.
Осы мәлімдеменің алдында Дональд Трамп пен Владимир Путин телефон арқылы сөйлескен. Бір сағатқа созылған әңгіме барысында тараптар Ирандағы әскери операция мен Украинадағы жағдайды талқылады. Трамптың сөзіне қарағанда, Ресей басшысы Вашингтонның Иранға қатысты қатаң әрекеттеріне таңданыс білдірген. Өз кезегінде Путин Таяу Шығыстағы қақтығысты саяси-дипломатиялық жолмен шешуге қатысты өз ұсыныстарын айтты.
АҚШ әкімшілігі бұл қадамды «прагматикалық шешім» деп атап, Ресейге жасалатын жалпы стратегиялық қысымның өзгермейтінін білдірді. Дегенмен санкциялардың ішінара босатылуы әлемдік мұнай бағасына бірден әсер етіп, Brent маркалы шикізат құнының 100 доллардан төмен түсуіне септігін тигізеді. Ал Еуропалық Одақ өкілдері шешімге алаңдаушылық танытып, Ресейдің кірісін шектеу саясатын жалғастыру қажеттігін ескертті.
