Қырғызстан астанасында халықаралық деңгейде бала саудасымен және оларды қанаумен айналысқан қылмыстық топқа қатысты сот үкімі шықты. Айыпталушылар арасында Қазақстан азаматы да бар, – деп хабарлайды 7-su.kz ақпараттық порталы.
Тергеу мәліметтеріне сәйкес, бұл іс 2024 жылдың қыркүйегінде Қырғыз Республикасының Ұлттық қауіпсіздік мемлекеттік комитеті (ҰҚК) кәмелетке толмағандарды ел асырып, заңсыз сату арнасын әшкерелегеннен кейін басталған. Қылмыстық топтың құрамында Қазақстан, Қырғызстан және Израиль азаматтары болған.
Қазақстан азаматы А.А. Израиль азаматымен алдын ала сөзге келісіп, Қырғызстан азаматынан үш баланы ақшалай сыйақыға сатып алған. Сонымен қатар, қаскөйлер тағы екі балаға қамқоршылық орнату туралы жалған рұқсат алып, оларды да өз бақылауына алған. Қылмыстың ең сорақы тұсы – олар балаларды жалаңаштап, интимдік суреттерге түсірген және ол фотоларды шетелдегі үшінші тұлғаларға мессенджерлер арқылы жіберіп отырған.
Бішкек қаласының Бірінші май аудандық соты 2026 жылдың 12 наурызында бұл іске қатысты соңғы шешімін шығарды. Сот айыпталушылардың әрекетінде бала саудасы мен кәмелетке толмағандарды қанау фактілері толық дәлелденді деп тапты.
Сот шешімі бойынша:
-
Қазақстан азаматы А.А.: Мүлкі тәркіленіп, 12 жылға бас бостандығынан айырылды.
-
Қырғызстан азаматы С.С.: Мүлкі тәркіленіп, 11 жылға темір торға тоғытылды.
Жазаны өтеу мерзімі қатаң тәртіптегі колонияларда жүзеге асырылмақ. Сонымен қатар, Израиль азаматына қатысты материалдар жеке өндіріске алынып, халықаралық іздеу шаралары жалғасуда.
Бұл оқиға трансшекаралық қылмыстың қауіптілігін тағы да дәлелдеді. Мамандардың пікірінше, балаларға қамқоршылық орнату және оларды шетелге шығару процестерінде мемлекеттік бақылауды күшейту қажет. Бұл жағдай құқық қорғау органдарының қырағылығы арқасында ғана әрі қарай ушықпай тоқтатылды.
Балалардың қауіпсіздігі – қоғамның басты құндылығы. Мұндай ауыр қылмыстарға берілетін жазаның қатаңдығы басқаларға сабақ болуы тиіс.
