Жаңадан құрылған «Мұхамеджан Тынышбаевтың мұрасы» қоғамдық қоры өз қызметін Сарқан ауданынан бастады. Қор жетекшісі Саят Есімхановтың ұйытқы болуымен алғашқы жиын Қарғалы ауылында өтті, – деп хабарлайды 7-su.kz ақпараттық порталы.
Басқосу ең әуелі ұлт қайраткерінің рухына тағзым етуден бастау алып, еңселі ескерткішіне гүл шоқтарын қою рәсімімен өрбіді.
Жиын барысында мектеп жанындағы музей көпшілік назарына ұсынылып, тағылымды таным алаңы ретінде кеңінен таныстырылды. Одан әрі ұйымдастырылған ғылыми-танымдық конференцияда Мұхамеджан Тынышбаевтың ғұмыр жолы, қоғамдық-саяси қызметі, сондай-ақ ғылым саласындағы еңбектері жан-жақты сараланды.
Аталмыш кездесуге Сарқан ауданының әкімі Ғалымжан Маманбаев, қайраткердің ұрпағы Елена Ескендірқызы, Қазақстан Республикасы Ұлттық ғылым академиясының академигі, экономика ғылымдарының докторы, профессор Ерлан Арын, тарих ғылымдарының докторы, Әл-Фараби атындағы Қазақ ұлттық университетінің профессоры Гүлбану Жүгенбаева, техника ғылымдарының кандидаты, М.Тынышбаев атындағы ALT университетінің «Жылжымалы құрам» кафедрасының меңгерушісі Ғалымжан Әшірбаев және зиялы қауым өкілдері мен қоғам белсенділері қатысты.
Кеш соңында жергілікті мешітте Құран бағышталып, алаш ардақтысының рухына дұға арналды.
