Олжас Сүлейменовтің 90 жылдық мерейтойына арналған халықаралық мәдени-рухани іс-шаралар Түркия Республикасының Анкара қаласында жоғары деңгейде өтті. Мерейтойлық бағдарлама аясында көрме, дөңгелек үстел, әдеби кездесу мен деректі фильм көрсетілімі өткізілді.
Шара ТҮРКСОЙ, Түркия жазушылар одағы және Анкара әлеуметтік ғылымдар университеті алаңдарында ұйымдастырылды. Басты мақсат – ақынның шығармашылық мұрасын дәріптеу, түркі халықтарының рухани байланысын нығайту және қазақ әдебиетін халықаралық деңгейде насихаттау.
ТҮРКСОЙ халықаралық ұйымында «Олжас Сүлейменов. «Тауды аласартпай, даланы асқақтату» атты көрменің ашылу рәсімі өтті. Көрмені әл-Фараби атындағы Қазақ ұлттық университетінің магистранты Арлан Анер таныстырды.
Одан кейін дөңгелек үстелде әдебиет пен мәдениет саласының белгілі өкілдері, ғалымдар, дипломаттар мен қоғам қайраткерлері сөз сөйлеп, Олжас Сүлейменовтің түркі әлеміндегі орны мен шығармашылық мұрасы туралы ой-пікірлерін ортаға салды.
Жиынға Сұлтан Раев, Аманжол Қалыш, Еркебұлан Сапиев, Мухаммет Енес Кала, Муса Казым Арыжан, Рәшад Мамедов және өзге де мәртебелі қонақтар қатысты. Сонымен қатар, Қазақстан Жазушылар одағы басқармасының төрағасы Мереке Құлкенов пен ақын Ұлықбек Есдәулеттің бейнеқұттықтаулары көрсетілді.
Шара барысында режиссер Игорь Гонопольскийдің «Людям я не лгал…» атты деректі фильмі көпшілік назарына ұсынылды. Фильмде ақынның өмірі мен шығармашылық жолы кеңінен қамтылды. Түркия Жазушылар одағы ғимаратында «Олжас Сүлейменов» атындағы оқу залы салтанатты түрде ашылды. Бұл бастама қазақ әдебиетін түрік оқырмандарына таныстырудағы маңызды рухани оқиғаға айналды.
Анкара әлеуметтік ғылымдар университеті қабырғасында халықаралық дөңгелек үстел ұйымдастырылып, оған Қазақстан мен Түркияның әдебиеттанушылары, ғалымдары, ақындары мен қоғам қайраткерлері қатысты. Басқосуда Олжас Сүлейменовтің поэзиясы, қоғамдық қызметі және түркі әлеміне қосқан рухани үлесі жан-жақты талқыланды.
Іс-шара аясында ақынның түрік тіліне аударылған еңбегінің тұсаукесері өтті. Оны ғалым-аудармашы Ораз Сапашев таныстырды. Сонымен қатар, Павлодар облысы мен Баянауыл өңірінен келген делегация өкілдері құттықтау сөз сөйлеп, ақынға деген ыстық ықыластарын жеткізді.
Гүлжан ТҰРСЫН
Анкара қаласы
