Кербұлақ ауданының әкімі Жанат Жүнісбеков Қаспан ауылдық округіне қарасты Көксай, Сайлыкөл, Қайнарлы, Шаған және Қаспан ауылдарының тұрғындарымен арнайы кездесу өткізді. Жиында жергілікті халықты мазалаған өзекті мәселелер талқыланып, көтерілген әрбір түйткіл бойынша тиісті мекемелерге нақты тапсырмалар берілді, – деп хабарлайды 7-su.kz ақпараттық порталы.
Мұндай ашық диалог шараларының негізгі міндеті Мемлекет басшысының Жарлығымен бекітілген маңызды тапсырмаларды жергілікті тұрғындарға тікелей жеткізу. Сонымен қатар аудан басшысы өткен кездесулерде халық тарапынан көтерілген өзекті мәселелердің орындалу барысын саралап, атқарылған жұмыстардың есебін берді. Ауыл тұрғындары өздерінің ұсыныс пікірлерін ортаға салып, инфрақұрылым мен әлеуметтік салаларды дамыту жайын қозғады.
Аудан басшылығы биылға қойылған негізгі міндеттер мен мақсаттарды айқындап, олардың жүйелі түрде орындалуын қамтамасыз етуді көздеп отыр. Әкімдік өкілдері ауылдық аймақтардағы халықтың тұрмыс сапасын жақсарту бағытындағы жұмыстардың тұрақты бақылауда болатынын жеткізді. Кездесу соңында тұрғындар тарапынан айтылған әрбір өтініш хаттамаға енгізіліп, арнайы бақылауға алынды.
