Қырғызстан астанасында өткен қоян қолтық ұрыс бойынша әлем чемпионатында Жетісу облысының намысын қорғаған төрт бірдей спортшы қыз екінші орыннан көрініп, күміс жүлдегер атанды, – деп хабарлайды 7-su.kz ақпараттық порталы.
Халықаралық додада еліміздің мерейін үстем еткен арулардың бұл жетістігі өңірдегі спорт саласының жоғары деңгейде дамып келе жатқанын айқын көрсетеді.
Жетісу облысының дене шынықтыру және спорт басқармасының баспасөз қызметінің мәліметінше Бішкек қаласында мамырдың 16-сы мен 19-ы аралығында ұйымдастырылған байрақты бәсекеде әлемнің 22 мемлекетінен келген 380-нен астам ең мықты атлет өзара бақ сынасып, үздіктерді анықтады.
Жарыс қорытындысы бойынша ересектер арасында сынға түскен жетісулық спортшылар Сабина Қанатбек пен Диана Елеусіз шеберлік танытып, тұғырдың екінші сатысына көтерілді. Сондай ақ 16-17 жас ерекшелігі бойынша бақ сынаған жас таланттар Айгерім Рысқалды мен Рауза Хамзина да өз қатарластарынан озып шығып, әлемдік доданың күміс жүлдесіне лайық деп танылды. Жетісу облысының атынан қатысқан бұл бұрымдылар өздерінің жоғары кәсіби дайындығы мен жеңіске деген зор жігерін көрсетіп халықаралық аренада Қазақстанның абыройын асырды.
