Сәкен Сейфуллин атындағы облыстық кітапханасында қазақ поэзиясының мөлдір мұңын, жүрек лүпілін, нәзік иірімін арқалаған әсерлі әдеби кеш өтті. Ақын, Қазақстан Жазушылар одағының мүшесі, халықаралық «Шабыт» фестивалінің жүлдегері Толқын Қабылшаның «Толқын да толқын ғұмырым…» атты шығармашылық кездесу кеші жырсүйер қауымның рухани тынысын кеңейтіп, әдеби ортаға ерекше сезім сыйлады.
Кешке қазақ әдебиетінің көрнекті өкілдері мен зиялы қауым қатысып, ақын шығармашылығы төңірегінде терең ой қозғады. Олардың қатарында ақын, Қазақстанның Құрметті жазушысы Нүсіпбай Әбдірахым, Қазақстан Жазушылар одағы Жетісу облыстық филиалының өкілі Жангелді Немеребай, жазушы, Халықаралық «Алаш» әдеби сыйлығының иегері Нұрила Бектемірова, Сағыныш Намазшамова, Гүлбақыт Қасен, Торғын Тұрлыбаева, Зирагүл Нұрданбек сынды аяулы ақын қыздар мен өзге де әдебиетсүйер қауым болды.
Поэзия кеші жалынды жырмен, терең тебіреніспен өрілді. Толқын Қабылша жүрек түкпірінен туған өлеңдерін оқып, оқырманын сырлы сезім иіріміне жетеледі. Ақынның әр шумағынан өмірдің ащы-тұщысы, әйел жанының нәзіктігі, адам көңілінің алай-дүлей толқыны аңғарылып тұрды.
Жиында сөз алған қаламгерлер де жырдан шашу шашып, ақынның шығармашылық әлеміне тоқталды. Әсіресе, жан құрбысы Сағыныш Намазшамованың ақын туралы жүрекжарды пікірі көпшілік көңілін толқытты. Ол Толқын Қабылшаның поэзиядағы орны мен адамдық болмысын тебіреніспен әңгімелеп, қалам иесінің шынайы бейнесін ашып берді.
Өз кезегінде кеш кейіпкері жетісулық ағайынға алғысын арнап, өзінің ең алғашқы «Бір өлең – бір әлем» атты туындысын оқыды. Бұл сәт жиналған жұртшылықты өткен күндердің естелігіне жетелеп, ақынның шығармашылық сапарының бастауына көз жүгірттірді.
Әдебиет пен өнерді ардақтаған қауым кеш соңында кейіпкерге құрмет көрсетіп, иығына камзол жапты. Бұл – сөз өнеріне көрсетілген тағзым, жыр иесіне деген ел ықыласының айғағы еді.
Санжар СҰЛТАНҒАЗЫ
Талдықорған қаласы
