Миланда өткен 2026 жылғы қысқы Олимпиада ойындарында мәнерлеп сырғанаудан тұңғыш рет алтын медаль алып, ел қоржынына 32 жылдан кейін қысқы Олимпиада ойындарынан алтын сыйлаған 21 жастағы Михаил Шайдоров 5 айдан бері жалақы алмағанын мәлімдеді. Спортшы бұл жөнінде Тимур Балымбетовке берген сұхбатында айтты.
Михаил Шайдоров пен оның бапкерлер құрамы тарихи жеңістен кейін 5 ай бойы еңбекақы алмаған. Оның үстіне, спортшы 1 ақпаннан бастап дәрігерлік бақылаудан да айырылып қалғанын айтады. Жаңа маусымға арналған оқу-жаттығу жиындары мен бағдарламалар жоспары бекітілгенімен, қаржыландырудың жоқтығынан алдағы дайындықтың қалай өтетіні белгісіз күйде қалып отыр.
Шайдоров Олимпиадаға дейінгі төрт жылдық циклде костюм тіктіру, бағдарламалар қою сияқты негізгі шығындарды өз қалтасынан төлегенін, мемлекеттік қолдау тек 2025 жылғы Әлем чемпионатындағы күміс жүлдеден кейін ғана аздап болғанын жеткізді. Осы орайда, Туризм және спорт министрлігінің тек 2025 жылғы шығындарды жариялап, мұны «мемлекеттік қолдаудың тиімділігі» ретінде көрсетуге тырысуын спортшы өз еңбегін құнсыздандыру және жеке мәліметтерді рұқсатсыз жариялау деп есептейді.
Олимпиада чемпионын дайындау бір жылдың емес, көпжылдық үздіксіз еңбектің нәтижесі екенін алға тартқан Шайдоров бүгінде шенеуніктердің жеңіске ортақтасқанымен, чемпионның іс жүзіндегі қажеттіліктеріне, тіпті айлық жалақысына келгенде дәрменсіздік танытып отырғанына қынжылады. Жеңімпаздың басты мақсаты – тек кедергісіз дамып, ел туын көтеру, бірақ қазіргі жағдай оның келесі маусымға деген дайындығына үлкен сұрақ белгісін қойып тұр.
«Жетісу-Ақпарат».
