Павлодар қаласында жағажай футболынан Қазақстан Суперкубогының матчтары өтіп, Жетісу облысының «Малайсары» командасы жеңімпаз атанды, – деп хабарлайды 7-su.kz ақпараттық порталы Aikyn.kz сайтына сілтеме жасап.
Екі кездесуден тұрған тартысты бәсекеде жетісулық ұжым павлодарлық «Арман» командасынан басым түсті. Қазақстан футбол федерациясының мәліметінше, алғашқы матчта «Малайсары» қарсыласын 5:3 есебімен жеңсе, екінші кездесуде 5:4 есебімен басым болды.
Осылайша қос ойынның қорытындысы бойынша «Малайсары» командасы Қазақстан Суперкубогын иеленді.
Айта кетейік, жетісулық команданың шабуылшысы Мехди Ширмохаммади жоғары ойын өрнегін көрсетіп, Суперкубок матчтарының үздік ойыншысы атанды.
