Талдықорғандағы Орталық бассейнде 14 жасқа дейінгі жасөспірімдер арасында ел чемпионатының 2-ші кезеңі аяқталды. Чемпионат жалпы 4 турдан тұрады. Келесі айналым (3-тур) тамызда Павлодарда өтеді. Ол жерде 10 команданың арасынан шешуші кезеңге қатысатын 8 команда анықталады. Ал чемпионаттың жеңімпазы қазан айында – соңғы турда белгілі болады.
Су добы кейінгі жылдары елімізде қайта қарқын алып, талай талантты баланы спорт әлеміне танытып жатыр. Жасөспірімдер арасындағы жарыстар жиілеп, олардың шеберлігін арттыру мақсатында ережерелерге де өзгеріс енгізілді. Мәселен, бұрын бір команда 1 күнде 1 рет ойнаса, қазір 1 күнде 2 кездесу өткізеді.
– Жетісу жерінде болған су добынан ел чемпионаты Халықаралық жарыстардан кем түскен жоқ. Мықтылар өте көп. Жеңімпазды тап басып айту өте қиын. Әр ойын тартысқа толы. Турнирлік кесте шиеленісе түсті, – дейді су добынан ҚР мемлекеттік жаттықтырушы Ерік Көпбергенов.
Чемпионаттағы 2 турдың қорытындысы бойынша «Астана 1» командасы 51 ұпаймен көш бастап келеді. Одан кейін 43 ұпай жинаған «Тараз» 2-орын, ал үштікті «Талдықорған» командасы 39 ұпаймен түйіндеп тұр.
Серік ҚАНТАЙ
