Жетісу облысы Алакөл аудандық сотында азамат К.-ға қатысты медициналық сипаттағы мәжбүрлеу шараларын қолдану туралы қылмыстық іс қаралды, – деп хабарлайды 7-su.kz ақпараттық порталы azh.kz сайтына сілтеме жасап.
Күдіктіге Қазақстан Республикасы Қылмыстық кодексінің 115-1-бабы (сталкинг, яғни қудалау) және 293-бабының 3-бөлігі (қару қолдану арқылы жасалған бұзақылық) бойынша қоғамға қауіпті әрекеттер жасады деген айып тағылды.
Сот анықтағандай, Алакөл ауданының тұрғыны бірнеше ай бойы жәбірленуші қыздың еркіне қарсы онымен байланыс орнатуға тырысқан. Іс материалдарына сәйкес, оның бұл әрекеттері психологиялық қысыммен ұласып, бойжеткеннің бойында қорқыныш пен үрей сезімін тудырған. Бұдан бөлек, ер адам жәбірленушінің интернеттегі жеке парақшаларын тауып алып, оған тұрақты түрде хабарламалар жолдап отырған.
Сондай-ақ оның жергілікті дүкендердің бірінде жәбірленушіні балағаттап, ар-намысы мен қадір-қасиетін қорлағаны белгілі болды. Осы сәтте дүкенде болған куәгер ер адамға ескерту жасап, бойжеткенмен мұндай тонда сөйлеспеуін талап еткен. Соттың анықтауынша, осыдан кейін айыпталушы үйіне барып, пышақ алып қайта оралған. Ол дүкен ішінде пышақ сермеп, куәгерге күш қолдану қатерін төндірген және қоғамдық тәртіпті бұзған.
Сот отырысы барысында жәбірленушілер мен куәгерлердің түсініктемелері, сараптама қорытындылары және істің өзге де материалдары мұқият зерттелді. Кешенді сот психологиялық-психиатриялық сараптамасының қорытындысына сәйкес, азамат К. психикалық аурумен ауыратыны анықталды. Сарапшылар оның қоғамға қауіпті әрекеттерді жасау сәтінде өз іс-әрекетінің шынайы сипаты мен қауіптілігін сезіне алмаған, сондай-ақ өзіне-өзі ие бола алмаған деген қорытындыға келді.
Осыған байланысты сот ер адамды қылмыстық жауаптылықтан босатты. Оған жалпы үлгідегі психиатриялық стационарда мәжбүрлі түрде емдеу түріндегі медициналық сипаттағы шара тағайындалды.
