Қаратал жағажайында Жетісу облысының дін істері басқармасының ұйымдастыруымен мемлекет және қоғам қайраткері, Алаш арысы Әлихан Бөкейханның туғанына 160 жыл толуына арналған «Ұлт көсемі Әлихан Бөкейханның туғанына 160 жыл. Алаш рухы – ұлт бірлігінің тұғыры» атты ашық аспан астындағы тағылымдық іс-шара өтті.
Аталған шараның мақсаты – жастар арасында ұлттық құндылықтарды дәріптеу, тарихи сананы қалыптастыру, Әлихан Бөкейханның ел тәуелсіздігі жолындағы қызметін кеңінен насихаттау және өскелең ұрпақты рухани-адамгершілік құндылықтар негізінде тәрбиелеу.
Мазмұнды шарада 18-35 жас аралығындағы жастар, спортшылар, маргиналды жастар және қала тұрғындары арнайы дайындалған танымдық бағдарламаларға белсене атсалысты. Ұлттық тарих пен рухани мұраны дәріптеуге бағытталған басқосу көпшіліктің қызығушылығын оятып, ерекше әсер қалдырды.
Өз кезегінде әл-Фараби атындағы Қазақ ұлттық университетінің Дүниежүзі тарихы, тарихнама және деректану кафедрасының аға оқытушысы, PhD докторы Еркін Стамшалов «Әлихан Бөкейхан және Мұхамеджан Тынышпаев: Алаш ардагерлерінің өмірі мен қызметіндегі үндестіктер» тақырыбында дәріс оқып, қос тұлғаның қоғамдық-саяси қызметіне, ұлттық мүдде жолындағы күресіне және олардың идеялық сабақтастығына жан-жақты тоқталды.
Шара аясында Әлихан Бөкейханның өмірі мен қоғамдық қызметіне арналған зияткерлік ойын ұйымдастырылды. Қатысушылар Алаш қозғалысы тарихы, ұлттық мемлекет құру идеясы және Әлихан Бөкейханның өмір жолына қатысты сұрақтарға жауап беріп, білімдерін сынады. Нәтижесінде ерекше белсенділік танытып, жоғары ұпай жинаған қатысушылар ұйымдастырушылар тарапынан арнайы сыйлықтармен марапатталды. Сонымен қатар қатысушылар назарына Алаш қайраткерлерінің мұрасын насихаттауға арналған кинокеш ұсынылды. Кинотуындылар арқылы жастар қазақ зиялыларының ел болашағы үшін атқарған еңбектерімен жақынырақ танысып, тарихи оқиғаларға жаңаша көзқарас қалыптастыруға мүмкіндік алды. Іс-шара барысында «STOP EXTREMISM» атты флешмоб өткізіліп, қоғамдағы тұрақтылықты сақтау, жастар арасында экстремизм мен радикалды идеологиялардың алдын алу, бейбітшілік пен келісім құндылықтарын дәріптеу мәселелеріне ерекше назар аударылды.
Алаш қозғалысының тарихы мен оның қазақ қоғамының дамуына қосқан үлесі туралы тың мәліметтер алған қатысушылар, өз кезегінде ұлттық бірлік, тарихи жады және елдік құндылықтар жөнінде пікір алмасты. Мұндай іс-шаралар жастардың тарихи санасын нығайтып қана қоймай, олардың азаматтық жауапкершілігін арттыруға, отансүйгіштік рухын қалыптастыруға және ұлттық мұраға деген құрметін күшейтуге ықпал етеді.
Алаш қайраткерлерінің идеялары мен мұрасы бүгінгі күні де өз маңызын жоғалтқан жоқ. Сондықтан ұлттық тарихты дәріптеуге бағытталған мұндай бастамалар қоғамның рухани дамуына қызмет етіп, жастарды елжандылыққа тәрбиелеудің тиімді құралы болып қала береді.
А. Жұмаш
Облыстық дін істері басқармасы ақпараттық-түсіндіру жұмыстары және
БАҚ-пен байланыс бөлімі
