Алматылық «Қайраттың» жас шабуылшысы Дастан Сәтбаев жақын күндері ресми түрде Лондонның «Челси» клубының сапына қосылады, – деп хабарлайды 7-su.kz ақпараттық порталы.
24KZ мәліметінше, қазақ футболы үшін маңызды кезең жақындап келеді. Жақында ғана мектеп бітіріп, аттестат алған Дастан Сәтбаев әлемнің ең танымал клубтарының бірі – «Челсиде» жаңа белеске қадам баспақ.
Футболшы кеше алматылық жанкүйерлер алдында соңғы матчтарының бірін өткізіп, екі гол соқты. Кездесуден кейін жанкүйерлер жас талантты ерекше құрметпен шығарып салды.
Дастан Сәтбаевтың есімі соңғы екі жылда қазақ футболындағы ең көп талқыланған тақырыптардың біріне айналды. Былтыр ақпан айында «Челси» мен «Қайрат» клубтары ойыншының трансфері бойынша келісімге келген болатын. Трансфер құны 4,3 миллион еуроны құрады. Тараптар бес жылдық келісімшартқа қол қойған.
«Қайрат» футбол клубының президенті Қайрат Боранбаевтың айтуынша, лондондық клуб ойыншыны жақын күндері өз қатарына шақырған.
– Бізге «Челсиден» хат келді. Олар осы айдың 29-ы күні Австралиядағы оқу-жаттығу жиынына аттанады екен. Сондықтан хатта Дастанның 26 маусымда Лондонға келгені жөн деп көрсетілген. Біз бұл өтінішпен толық келістік. Ешқандай қарсылығымыз жоқ. Ол 21 маусым күні сырт алаңдағы бір матчқа қатысуы мүмкін. Одан кейін бес күн демалыс береміз. Дастан 26 маусымда анасымен бірге Англияға ұшып кетеді, – деді Қайрат Боранбаев.
