Ауыл тұрғындары қуанышты. Осы ретте Ескелді ауданына қарасты Жетісу елді мекенінде блокты-модульді дене шынықтыру-сауықтыру кешені ашылды. Жаңа нысанның ашылуы сән-салтанатпен аталып өтті. Қариялар жағы бата беріп, ақжаулықты аналар шашу шашты.
Жетісу ауылында бұрын-соңды мұндай дене шынықтыруға арналған ғимарат болмаған. Жергілікті жастар көрші ауылдар мен қалаға барып спортпен шұғылданатын. Енді ат арытып әлекке түспейді. Өздері туған мекенде волейбол, шағын футбол, күрес, тағы да басқа спорт түрлерімен айналыса алатын болады.
Жаңа ғимараттың ашылу салтанатының алғысөзін аудан әкімі Елдос Ахметов айтты. Тұрғындарды Жаңа жылмен құттықтай келіп, нысанның абыроймен ел игілігіне берілгенін атап кетті. Биыл аудан көлемінде балалар ойнайтын 3 жаздық алаң, 3 блокты-модульді дене шынықтыру кешені, 2 Мәдениет үйі, 3 дәрігерлік медициналық пункт, 2 әкімдік ғимарат салынғанын тілге тиек етті.
Жетісулықтарды облыстық дене шынықтыру және спорт басқармасы басшысының орынбасары Еркебұлан Дуанаев та құттықтай келіп, елге ақжарма тілегін арнады. Ол облыста спорттық инфрақұрлымды дамыту мақсатында 1,7 млрд. теңге бөлініп, 19 спорттық нысан салынғанын сөз етті. Мұның бәрі аймақ басшысының арқасы, оған айтылар алғыс шексіз екенін жеткізді.
Ауылда бой көтерген насанның жалпы ауданы 720 шаршы метр болса, оның ішкі ойын залының ауданы 504 шаршы метрді құрайды. Ғимараттың тұрғызылуы мердігер «Эснаф» ЖШС-не жүктелген болатын. Оның құрылыс жұмыстарына облыстық бюджеттен 120 000 000 теңге қаражат жұмсалыпты.
– Бүгін, міне, ауылымызда үлкен қуаныш болып жатыр. Бұл ауыл тұрғындарының көптен күткен ғимараты. Спорттық нысан болмаған күннің өзінде ауылымыздан небір спортшылар шыққан еді. Елді мекенімізден алдағы уақытта әлем чемпиондары шығады деген ойдамын, – дейді Елтай ауылдық округінің әкімі Алмас Құдайбергенұлы.
Медет ЖҰМАБАЙ
