Лондондық «Челси» клубының бас бапкері Хаби Алонсо жаңа ойыншылармен, соның ішінде Қазақстан құрамасының шабуылшысы Дастан Сатпаевпен жұмыс істеу үшін үш апта уақыт алады. Қазақстандық футболшы жаттығу жиынын негізгі құрамнан бұрын бастап кетті, – деп хабарлайды 7-su.kz ақпараттық порталы Vesti.kz сайтына сілтеме жасап.
Журналист Низар Кинселланың ақпарына сәйкес, «Челси» негізгі командасы маусым алдындағы дайындықты 9-10 шілдеде бастайды. Алайда, клуб академиясы қазірдің өзінде жұмыс істеуде. Алдын ала келісімшартқа отырған жаңа ойыншылар – Дастан Сатпаев пен Жеовани Кенда жаттығуларды мерзімінен бұрын бастады. Аталған мүмкіндік Хаби Алонсоға Азия турнесіне аттанбас бұрын ойыншылардың шеберлігін шыңдап, оларды өз тактикасына бейімдеуге көмектеседі.
Дастан Сатпаев үшін бас бапкердің сеніміне ие болудың маңызы зор. Он жеті жасар шабуылшы «Челси» базасына келіп, дайындыққа кірісті. Оның ресми таныстырылымы тамыз айында, яғни футболшы кәмелеттік жасқа толғанда және келісімшарты күшіне енгенде өтеді. Желіде қазақстандық футболшының ағылшын гранды сапындағы алғашқы жаттығуларының видеосы да жарияланды.
Дастан Сатпаев «Челси» сапына ауысқаннан кейін жанкүйерлеріне арнайы үндеу жолдап, қолдаулары үшін алғыс білдірді. Қазақстандық жас таланттың әлемдік деңгейдегі клубта бақ сынауы – отандық футбол тарихындағы елеулі оқиға. Оның жаттығу лагеріндегі белсенділігі мен табандылығы бапкерлер штабының көңілінен шығады деген сенім бар.
«Челси» – әлемдегі ең ірі әрі танымал клубтардың бірі. Мұндай ұжымда тәжірибе жинақтау Дастанның кәсіби өсуіне жол ашады. Қазақстандық шабуылшының ағылшын Премьер-лигасындағы алғашқы қадамдары көпшіліктің назарында. Жас футболшының жаттығу процесін ерте бастауы оның мақсатының айқындығын және еңбекқорлығын көрсетеді. Сатпаевтың сәтті өнер көрсетуі – болашақ жастар үшін үлкен мотивация.
