«Қайрат» футбол клубы УЕФА Чемпиондар лигасының 1-ші іріктеу кезеңіндегі алғашқы ойынын сәтті бастады. Алматының Орталық алаңында «Сутьеска» (Черногория) командасын қабылдап, 2:1 есебімен жеңді. Қарымта кездесу 15 шілдеде сырт алаңда өтеді.
Ойынның алғашқы бөлігінде есеп ашылмады. Жоржиньо 33-ші минутта гол салғанымен, офсайдта қалып қойғандықтан есепке алынбады.
Кездесудің 74-ші минутында Ойва Юкколаның орнына кірген 18 жастағы Исмайл Бекболат алаң ортасында жасындай жарқырады. Ол 74-ші минутта Лукас Африкуға нәтижелі пас берді. Черногориялықтар сапынан ойын аяқталар тұста (90-шы минутта) Марко Мрвальевич есепті теңестірді. «Қайратты» тең нәтижеден құтқарып қалған тағы Исмайл Бекболаттың пасы. Исмайл 90+2-ші минутта командаға қосылғанына көп болмаған, соған қарамастан нәтижелі ойынымен көзге түсіп жүрген испаниялық Марк Гуальдың гол салуына себепші болды. Есеп – 2:1!
Чемпиондар лигасының 2-ші іріктеу кезеңінде ойнайтын команда Черногорияда шешіледі. Алматыдағы жеңіс «Қайратқа» айтарлықтай басымдық беретіндігі анық.
«Жетісу-Ақпарат».
