Оқи отырыңыз
Биыл қазақстандықтар үшін ерекше жақсы жаңалықтарымен есте қалары сөзсіз. Әуелі елді Елбасының «Болашаққа бағдар: рухани жаңғыру» атты мақаласы елең еткізді. Сөйтіп, бұл құжат та зиялы қауым өкілдерінің қызу талқысы мен қуана қолдауына ие болды. Әрбір ұлттың өзіндік баға жетпес құндылықтары болары сөзсіз. Қазақстан қазіргі кезеңде әлемдік деңгейде Орта Азияның көшбасшысы ретінде танылып, игілікті істермен батыл қадамдарға барып, әлемдік басшылар мен сарапшылардың қолдауына ие болуда.
Осы орайда халықаралық ауқымды шара аясында Алматы облысының көрме күні де басталып, жер жаннаты Жетісу өңірінің жетістіктерімен бірге, көрікті жерлері мен қосымша тарихи жәдігерлеріміздің көрсетілуі қазақ елінің мәртебесін тағы да жаңа қырынан танытты деп ойлаймын. Айталық, Шалқар радиосының сазды сәлем бағдарламасынан аудандық әкім аппараты ішкі саясат бөлімінің меңгерушісі Гүлмира Бекбатырова әлемдік үлкен шара аясында өңір жұртын құттықтап, шақыруын естіп бір марқайып қалдым. Жетісуда Кербұлақ ауданының өзіндік алар орны ерекше. Шоқан Уәлихановтың мұражайы, «Алтынемел» ұлттық паркі, кешегі ат тұяғын дүбірлеткен батырларымыз, қасиетті домбыраның шанағынан жыр арнап, күй төккен қаншама ұлы ақын-жырауларымыз жатыр. Олардың асыл қасиеттері бүгінгі ұрпаққа үлгі-өнеге.
Осындай баға жетпес құндылықтарды дәріптеуде аудан әкімі Бағдат Әлиевтің еселі еңбектерін атамай өтуге болмайды. Сарыөзек тоғыз жолдың торабында орналасқан. Бір шеті Ресейге, бір шеті күн шығысында Қытаймен байланыстағы күре жолы Сарыөзек арқылы өтетінін ескерсек, аудан орталығының көз тартарлық болмауы мүмкін емес. Аудан көлеміндегі игі бастамалар мен оңтайлы шешімдер баспасөз беттерінен жазылып, ауылдық округ өңіріндегі оң өзгерістер телеарна эфирінен көрсетіліп жатты. Оның бәрін тәптіштеп тізіп жатпай, Сарыөзектің айналма жолы маңындағы шағаладай сап түзеп, бой көтерген тұрғын үйлер мен зәулім ғимараттарды айтсақ та жеткілікті. Әсіресе, сымдай тартылып жатқан жаяу серуендеушілер мен кешкілік күнделікті күйбің тірліктен шаршағаныңды басатын көк желкенге оралған саябағымыз әркімнің көз қуанышы. Кезінде осы аудан орталықтарының әрбір тұрғынының жатса да, тұрса да «шіркін-ай ауызсуға жаритын күн болар ма?» деген араманы келмеске кетті. Өйткені, тұрғындар ауызсумен қамтылып қана қоймай, саябақтағы кешкілік атқылақтап тұрған субұрқақ бақты қыдырып жүрген серуендеушілердің көңілін жаңбырлы кештердегі қызарып батқан күннің шапағатына бөлері сөзсіз. Тағы да бір ауыз толтырып айта кетер аса күрделі күрмеуі шешілген мәселе – аудан орталығындағы жолдарға асфальт төселгені. Екі жылда 17 көшеге асфальт төселсе, алдағы уақытта 27 көшеге асфальт төселеді деп жоспарлануда. Ол, әрине, уақыттың еншісінде.
Аудан орталығындағы бабалар рухына орнатылған ескерткіш-тақтасы, Ұлы Отан соғысы ардагерлері мен еңбек озаттары батырларына арналған белгітастар баға жетпес мақтаныш. Жасыратыны жоқ, кезінде аса мән берілмей келген мәдениет саласы қамқорлыққа алынды. Олар облыс көлемінде өткізіліп келген аудандық мәдени іс-шаралардың нәтижесімен бас жүлдені қанжығалады. Қазақ айтса қалт айтпайды. «Ер-тоқымның батқанын иесі емес, ат білер, ағайынның қадірін жақыны емес, жат білер». Сырт көз сыншыл келеді. Көктемде облыстық жергілікті агроөнеркәсіптің кешені және мемлекеттік мекемелер қызметкерлері кәсіподағы КБ төрағасының орынбасары Рая Идралиеваның басшылығымен Еңбек кодексіне енгізілген 5 бап бойынша семинар, конференция жұмысы жүргізілген болатын. Сонда байқағаным, облысымыздың әр ауданынан келген аудандық жергілікті агроөнеркәсіп кешені және мемлекеттік мекеме қызметкерлері, кәсіподақтар одағының төрағалары аудан әкімі Бағдат Әлиевтің қабылдауында болып, өңірде атқарылған ауқымды жұмыстар мен алда тұрған кезек күттірмейтін қыруар шаруаны реттілікпен айтып, таныстырып бергеніне дән риза болып аттанды. Маусым айының басында Жамбыл ауданының орталығы Ұзынағашта өткен конференцияда: «Кербұлақта айтуға тұрарлық жұмыстар жүзеге асырылыпты. Әкіміне өте риза болдық», – деп Рая Идралиева атап өтті. Бұл «Ауылды түлету – халықты ұлы ету» деген қағиданы басшылыққа ала отырып, Елбасының дамыған отыз елдің қатарына енеміз деген бағдарламасына үлес қосылып жатыр деген сөз.
Ата Заңымыздың заман талабына қарай өзгеруіне үндеу қабылданғаны, оны бүкіл халықтың қолдауына ие болып, қызу сараптама, талқылаудан өткені белгілі. Сонда «Басты байлығымыз – адам» деп атап көрсетілген. Міне, сол тарапта бүгінгі күні кәсіподақ ұйымының атқарар жұмысы ауқымды. Оған басшыдан бастап, қарапайым қосшыға дейін Қазақстан Республикасының еңбек кодексін басшылыққа ала отырып, заң талаптары аясында еңбек етсе, игілікті нәтижесін берері анық. Бауыржан Момышұлы «Тәртіпке бағынған құл болмайды» деген көрегендігімен айтқан ұшқыр сөзді естен шығармаса ешкім де қателеспейді, сүрінбейді. Қазіргі уақытта «Нұр Отан» партиясының жүргізіп отырған саясатын кәсіподақ ұйымдары бірлесіп атқарып отырса, халықтың көкейінде қордаланған мәселелер уақытылы шешілетіні сөзсіз.
Еділхан ЕСКЕЛДИНОВ,
аудандық кәсіподақ төрағасы.
Кербұлақ ауданы.
