Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласында айтылған өзекті мәселелер мен ауқымды міндеттерді жүзеге асыру жұмыстарын талқылау мақсатында облыс әкімі Амандық Баталов Жетісу жерінің өркендеуіне үлес қосқан еңбек ардагерлері мен шығармашылық зиялы қауым өкілдерімен кездесу өткізді. Талдықорғандағы жеміс тәлім бағында өткен ашық кездесуді белгілі журналист Бейсен Құранбек жүргізіп отырды.
Еркін сипаттағы отырыстың алғашқы бөлігінде өңір жетекшісі аймақтың жетістігі мен көрсеткіші жайлы кеңінен айтып өтті.
– Құрметті зиялы қауым өкілдері! Ардақты ардагерлер! Сіздермен дидарласып, кездесіп отырғаныма қуаныштымын. Қазіргі уақытта халық пен биліктің арасында шынайы байланыс болмайынша қоғамдық пікір, азаматтық ұстаным қалыптаспайтынын өмірдің өзі дәлелдеп берді. Бүгінгі күні салмақты ой, сараптамалық пікір, елдік тұрғыда сөз қозғайтын зиялы қоғам қайраткерлерінің қатары толыға түсуде. Олар – сіздерсіздер! Сіздер мемлекеттік саясатты, жүргізіліп жатқан реформаларды, рухани жаңғыруды халыққа жеткізуде бізге қолдау көрсетіп келесіздер, – деген Амандық Ғаббасұлы облыста атқарылған жұмыстардың нәтижесін таныстырып өтті. – Біз 2017 жылды жақсы жаңалықпен бастадық, облыстың 2 миллионыншы тұрғыны дүниеге келді. Балаларды балабақшамен қамту көрсеткіші былтыр 83% болса, биыл жыл соңына дейін 95%-ға жетеді деп жоспарлануда. Биыл 44 мектептің құрылысы жүріп жатыр. Мүгедек балаларға арналған мектеп-интернаттың жобалық сметалық құжаттары әзірленуде. Мүмкіндігі шектеулі балаларға 9-шы сыныптан кейін арнайы кәсіптік білім беріліп, мамандық алып шығу мәселесі де қарастырылуда. Былтыр мүгедектерге 2,4 миллиард теңге бөлініп, олар әлеуметтік көмекшінің қызметімен, емдеу шараларымен, қажетті құралдармен қамтылды.
Облыс әкімінің айтуынша, Жетісудің жетістігін Елбасы еліміздің өзге өңірлеріне үлгі ретінде ұдайы айтып отырады. Жақында ғана Бурабайда облыс әкімдерімен кездескен Президент Нұрсұлтан Назарбаев Алматы облысының көрсеткіштерін мысалға алып, шаншыған шыбық өніп кететін өлкенің табысына ризашылығын білдірді.
Мемлекет басшысының ілтипатына ие болған Жетісу жерінің жетістігі шынында да қомақты. Оған облыс әкімі келтірген мәліметтер дәлел болады. Атап айтқанда, биылғы қаңтар-маусым айларында облыстың өнеркәсіп саласы 329,4 миллиард теңгенің өнімін өндірсе, ауылшаруашылық саласында құны 149,8 миллиард теңге болатын өнім алынған. Сондай-ақ, осы кезең аралығында 174,6 миллиард теңгенің инвестициясы тартылып, 12 мың 724 жұмыс орны құрылған. Соның арқасында жұмыспен қамту органдарына тіркелген 28 мың 944 адамның 12 мың 406-сы жұмысқа орналастырылған. Одан бөлек, 5 мың 994 адам қоғамдық жұмыстарға жіберілген. Жетісу жұртшылығын табиғи газбен қамтамасыз ету ісі жеделдетіліп, облыс аумағындағы 741 елді мекеннің 473-і газбен қамтамасыз етіліп жатыр. Газдандырудың алғашқы кезеңінде Жамбыл, Қарасай, Талғар, Іле, Еңбекшіқазақ, Ұйғыр, Панфилов, Көксу, Ескелді аудандары мен Қапшағай, Талдықорған, Текелі қалаларындағы үйлер табиғи газға қосылады. Сонымен қатар, Көксу қант зауыты толассыз жұмыстың арқасында биыл 300 мың тонна қант қызылшасын өңдеп, еліміздің барлық өңірлеріне жіберуді жоспарлап отыр. Бұл өз кезегінде қант қызылшасы алқабының көлемін ұлғайтады. Оған Ақсу қант зауытын іске қосу зор көмегін тигізбек. Одан бөлек, туризм саласының өркендеуі аймақтың дамуына үлес қоспақшы. Алакөл, Балқаш, Көлсай көлдеріне апаратын туристік бағыттарды жетілдіру еліміздің қоржынына мол табыс әкеледі. Оған қажетті тетіктер қазірдің өзінде қарастырылып, керекті қаржы бөлінуде. Бір сөзбен айтқанда, Жетісу өңірінің өркендеуіне қажетті бағыттар толығымен жұмыс істеуде. Дегенмен кемшін түсіп жатқан жерлері болса ақылшы ардагерлер мен зиялы қауым өкілдерінің кеңесін тыңдайтынын жеткізген Амандық Баталов сұрақ-жауап бөліміне кезек берді.
Бұдан соң кездесуге жиналған ардагерлер мен шығармашылық өкілдері өздерінің ойларын айтып, жүрекжарды тілектерін арнады. Атап айтқанда белгілі қоғам қайраткері Кеңес Аухадиев, композитор Мұратхан Егінбаев, жазушы Тұрсын Әбдуәли, ақын Айтақын Бұлғақов микрофонды кезекпен алып, атқарылған жұмыстардың нәтижелі болуына тілектес екендіктерін жектізді.
Мәди АЛЖАНБАЙ.