Төтенше жағдайлардың алдын алу мақсатында «Көктем – 2019» республикалық командалық-штабтық оқу-жаттығу басталды. Алматы облысында өткен Республикалық командалық-штабтық оқу-жаттығуларына әртүрлі техника мен арнайы жабдықтар, 137 адам қатысты.
Оқу-жаттығу жиынынан кейін облыстық әкімдікте штаб отырысы өтті. Төтенше жағдайлардың алдын алу мақсатында бас қосқан жиынды облыс әкімінің бірінші орынбасары Лаззат Тұрлашов өткізді. Жиын селекторлық режимде өтіп, оған облыстың барлық аудан, қала әкімдері қатысты. Лаззат Махатұлы бірінші сөзді облыстық төтенше жағдайлар департаменті төтенше жағдайларды жою бөлімі бастығының міндетін уақытша атқарушы азаматтық қорғау майоры Нұрлан Ыбышевқа берді.
Нұрлан Жолдасқанұлы облыста өткен оқу-жаттығу жиыны жайлы егжей-тегжей баяндап, өңірде төтенше жағдай туғызатын қауіпті аймақтарды атап өтті. Өткен жылмен салыстырғанда таулы аймақта қар қалыңдығы едәуір жоғары. Қар қалың түскенімен ауа райының қалыпты жағдайда екенін ескертіп, айтарлықтай қауіпті жағдай туғызбайтындығын тілге тиек етті. Сондай-ақ, бүгінгі таңда қандай жағдайға да қарсы тұруға облыстық төтенше жағдайлар қызметінің сақадай-сай тұрғанын атап өтті.
Бұдан кейін «Казгидромет» республикалық мемлекеттік кәсіпорнының Алматы облысы бойынша филиалының директоры Алмасхан Нұрланов сөз алып, алғашқы онкүндіктің ауа райы жайлы айтып өтті.
"Казгидромет" болжамы бойынша, облыс аумағында күндіз температура 0+8 градустан (кезеңнің соңына қарай +5+13 градусқа дейін) және түнгі температура – 2-10 градустан -2+3 градусқа дейін көтеріледі. Сонымен қатар, 28 ақпан мен 1 наурызда жауын-шашын болады деп күтілуде.
Ақпараттарды толықтай тыңдаған Лаззат Махатұлы төтенше жағдайлар департаменті мен аудан, қала басшыларына жағдайды жіті бақылап, қауіпті аймақтарға кезекшілік қоюды тапсырды.
Селекторлық режимде тыңдап отырған аудан әкімдері кезегімен сөз алып, аудандардағы жағдайды баяндады. Талғар ауданының әкімі Рыскелді Сәтбаев су басу қаупі бар аймақтарға кезекшілік қойып, төтенше жағдайдың алдын алу мақсатымен ауданда арнайы топ құрылғандығын және техника мен жанар-жағармайдың дайындалып қойғанын атап өтті. Бұған қоса су өткізу құбырлары мен арықтардың тазаланып, жағдайды күнделікті бақылап отырғанын жеткізді.
Жиын соңында облыс әкімінің бірінші орынбасары, штаб төрағасы Лаззат Тұрлашов қауіптің алдын алуға дайын болуды және жағдайды жіті бақылап, төтенше жағдайлар департаментіне күнделікті ақпарат беріп отыруды тапсырды.
Ришад ТҰРҒАНБАЙ