Оқи отырыңыз
«Жастар» спорт сарайында дәстүрлі доданың шымылдығы түрілді. Қазақстан Республикасының құқық қорғау органдары, арнайы және күштік құрылымдар қызметкерлері арасында «Динамо» дене шынықтыру-спорт қоғамының Қазақстан полициясының 25 жылдығына және «ЭКСПО – 2017» халықаралық көрмесіне арнаған шағын футболдан VI жазғы салалық спартакиадасы жалауын желбіретті.
Дүбірлі бәсекеге құқық қорғау саласының барлық қызмет түрлерінен тоғыз команда жасақталып, кім мықтыны анықтады. Жарыстың ашылу салтанатында облыс әкімі Амандық Баталов сөз сөйледі.
Өңір басшысы облыста атқарылып жатқан игі істерге тоқталды. Елбасының сарабдал саясатының арқасында бұқаралық спортты дамыту мақсатында көптеген шаралар ұйымдастырылып, спорттық нысандар бой көтеруде. Бүгінгі «Жастар» сарайының облыс орталығында орналасуы бір мақтаныш болса, алдағы уақытта суда жүзу спортын дамытуда арнайы талапқа сай 50 метрлік жүзу бассейні салынбақ. Сонымен қатар мәдениет ошақтары да бой көтеріп, қаламыздың көркеюіне, жас жеткіншектердің денсаулығын нығайтуға өз үлесін қоспақ деп сөзін түйіндеген облыс әкімі мұнан кейін Жетісу жерінің намысын қорғап жүрген талантты спортшылардың есімдерін мақтанышпен атап өтті. Расында да Алматы облысы спорттық сала бойынша алдыңғы қатардан көрініп жүрген аймақтың бірі. Республикалық жарыстарда, халықаралық аренада ел намысын қорғап жүрген жетісулық спортшылар көп. Рио Олимпиадасында да талантты ұл-қыздарымыз бақ сынап, жүлделі орыннан көрінді. Мұнымен қоса, мүмкіндігі шектеулі жандар арасында да ел абыройын асқақтатып жүрген спортшыларымыз қаншама?! Күні кеше ғана әлем кубогы үшін болған жарыста жеңімпаз атанған садақшыларымызды да айта кеткен жөн. Байрақты бәсекеде жүлде салып, ел қоржынын толтырып жүрген спортшылардың ішінде «Динамо» дене шынықтыру спорттық қоғамының да шәкірттері бар екені тілге тиек етілді. Міне осындай жетістіктерді саралай келе өңір басшысы бүгінгі жарысқа қатысушы командаларға сәттілік тілеп, бәсекені ашық деп жариялады.
Мемлекеттік Гимн орындалғаннан кейін ортаға «Динамо» дене шынықтыру спорт қоғамының орталық кеңесі төрағасының бірінші орынбасары Асқар Омарқұлов шығып, спортшыларға жеңіс тіледі. Сөзінің соңында спортқа қосқан үлесі мен «Динамо» қозғалысын қолдағаны үшін облыс әкімі Амандық Баталовты «Динамо қозғалысының дамуына сіңірген еңбегі үшін» медалімен марапаттады. Мұнан кейін сөз алған ҚР ІІМ арнайы даярлық департаментінің бастығы, полиция генерал-майоры Асқар Оспанов барлық құқық қорғау саласының қызметкерлерін полицияның 25 жылдығымен құттықтап, футболшыларға тартысты ойын көрсетіп, жеңіске жетулеріне тілектестігін білдірді.
Салтанатты шарадан кейін сап түзеген командалар ойынға кірісті. Төрт күнге созылатын бәсекенің шымылдығын ҚР Бас Прокуратурасы мен ҚР ІІМ Төтенше жағдайлар комитеті командаларының ойыншылары түрді. (Спартакиаданың нәтижесі жайлы мақаланы газетіміздің келесі санынан оқи аласыздар).
Ришад ТҰРҒАНБАЕВ
