Оқи отырыңыз
Жуырда күрделі жөндеуден өткен Талдықорған мемлекеттік архиві ел игілігіне тапсырылды. Салтанатты шараға облыс әкімінің бірінші орынбасары Лаззат Тұрлашов пен Талдықорған қаласының әкімі Бағдат Қарасаев арнайы қатысты. Күрделі жөндеуден өткен нысанның лентасын қиып, бөлмелерді аралап көрген Лаззат Махатұлы қуанышқа жиылған көпшілікті құттықтады.
– Өңіріміздің өткен тарихын білмек болғанда архивке сүйенетініміз анық. Ал келешегімізді де архивтің құзыретіне тапсырамыз. Сонымен қатар, ел мен жердің тарихын зерттеген жас ғалымдар мен өлкемізді тануға ниеттенген шетелдіктер де архивтен пайдаланады. Қысқасы, қай тұрғысынан келсек те архивтің өміріміздегі орны ерекше. Сондықтан биыл Талдықорған мемлекеттік архиві орналасқан ғимаратты күрделі жөндеуден өткізіп, жұрт үшін үлкен жұмыс атқардық, – деді ол.
Бастауын 1926 жылдан алатын Талдықорған мемлекеттік архиві содан бергі талай тарихи оқиғаның куәгері болып келеді. Архив ісі тәуелсіздік жылдары жандана түсті. Содан бері тәуелсіз еліміздің болашағы үшін қызмет істеген мекеме келешегі де кемел. Айталық, 1991 жылы архивтегі 440 қорда 83732 іс сақталса, бүгінде 690 қорда 245943 іс көздің қарашығындай қорғалуда. Қаржыландыру көзі 2001 жылы 5 млн. теңгеге жуық болса, қазір 25 млн. теңгеге жетті. Мекемедегі қызметшілер саны да көбейген. Демек, Талдықорған мемлекеттік архиві күн сайын өсу мен өркендеудің бағытында келеді.
Кейінгі жылдары мекеменің құзыретіне жүгінетіндердің саны артып, тынысы тіпті ашыла түскен. Алайда Кеңес одағы кезінде салынып, содан бері күрделі жөндеу жұмысы жүргізілмеген ғимараттың тозығы жетіп, заманға сай сапалы қызмет көрсетуге мүмкіндігі шектеулі болады. Осы келеңсіздікті ескерген облыс басшылығы биыл жергілікті бюджеттен 81 млн. теңге қаржы бөліп, нысанға күрделі жөндеу жұмысын жүргізді. Нәтижесінде, мамыр айында құрылысы басталған 4 қабатты архив ғимаратының барлық шаруасы белгіленген мерзімде бітіп, ел игілігіне берілді.
Осы орайда, күрделі жөндеуден өткен жаңа нысанның заманауи қызмет көрсетуге ыңғайлы жабдықталғанын айта кеткен жөн. Қонақтар әр кабинетті аралап, жоғары бағалады. Құрылыс жұмысына жауапты мердігер компания «Строй индустрия» ЖШС-нің құрышқолды жұмысшылары да бар күшін салғаны көрініп тұр. Бұрындары көнеріп, тозып, еңсесі түскен ғимарат бүгінде сәулеті мен салтанаты сай әдемі түрге енген. Жаңа нысанда жайланып отырып жұмыс істеуге барлық жағдай жасалыпты. Тіпті, заманауи технологиялардың мүмкіндігі арқылы қордағы құжаттар электронды айналымға енгізіліп, пайдалануға барынша жеңілдік жасалған.
Осы күні Жастар және Мүшелтой шағынауданында талдықорғандық спортсүйер балалар мен жастардың қуанышын еселеген 9 спорт және 7 ойын алаңы да қолданысқа берілді. Бұл кейінгі жылдары өңіріміздегі спортқа деген қолдау мен көмектің көптігін паш етті. Шара аясында аула спортынан фестиваль ұйымдастырылып, арқан тартыс, бұқа тартыс, гір көтеру, қол күрес сияқты ойын түрінен жарыстар өтіп, жеңімпаздар анықталды. Шаттығы шалқыған балғындар мен жігерін жаныған жастардың қуанышын көрген облыс және қала басшылары оларды алдағы уақытта атқарылатын жұмыстардан хабардар етіп, сенімін бекемдей түсті. Өз кезегінде жастар да өнерін көрсетіп, әлемдік додаларда топ жарып, ел мерейін үстем ететін спортшылар шоғырының өсіп келе жатқанын ұғындырды.
Қажет АНДАС.
