ЖАСЫ 55-ТЕН АСҚАН АТА-ӘЖЕЛЕРГЕ СМАРТФОН ҰСТАУДЫ ҮЙРЕТЕТІН КУРС АШЫЛДЫ

Уақыты: 27.10.2021
Оқылды: 952
Бөлім: КҮНДЕРЕК

Оқуға, үйренуге ешқашан кеш емес, әсіресе, біздің заманымызда! Технологиялардың тез өзгеретіні соншалық, университетті бітіргеннен кейін бір жыл өткен соң-ақ біліктілікті арттыру қажеттігі туындайды. Мұндайда аға ұрпаққа қиын. Біздің ата-әжелерімізге смартфон немесе компьютер қолдану қиынның-қиыны болып көрінеді.

Талдықорған қаласындағы Назарбаев Зияткерлік мектебінің оқушылары бұл мифті жоққа шығарып, зейнеткер әжелерді жаңа кәсіппен баурап алды. Оқушылар қарттарға арналған «Техникалық қолдау 55+» жаңа әлеуметтік жобаның бастамашысы болды.

Жоба егде жастағы адамдарға компьютерде жұмыс істеуді үйренуге, интернет арқылы басқа қалаларда тұратын жақындарымен сөйлесуге, оларды қызықтыратын ақпаратты пайдалануға және шығармашылық қабілеттерін дамытуға мүмкіндік беруге бағытталған.

Оқу аптасына екі рет Талдықорғандағы Достық үйінде өтеді. Өткен аптада бірінші сабақ ұйымдастырылды, онда жас еріктілер әжелерге ұялы телефон камерасымен қолдануды үйретті.

- «Техникалық қолдау 55+» қарт адамдардың қазіргі ақпараттық ортаға әлеуметтік бейімделу мәселелерін шешуде өзекті болып табылады. Қарт адамдар, әсіресе жалғызбасты адамдар, шын мәнінде, қазіргі коммуникациялық технологияларды үйреніп қана қоймай, сонымен қатар, тікелей және виртуалды қарым-қатынасқа мұқтаж. Мұның бәрі кешендегі аға буын адамдарының өмір сүру сапасын жақсартуға көмектеседі. Олардың қабілеттеріне жаңа мағына мен сенімділік береді, - дейді 11-сынып оқушысы, волонтер, жоба үйлестірушісі Әлішер Бекмұстафаев.

"ЖЕТІСУ-АҚПАРАТ"