Оқи отырыңыз
Біздің отандас замандастарымыздың бақ-тәлейіне еліміздің тәуелсіздігін өз көздерімен көріп, жаңа мемлекетті өз қолдарымен құру бақыты жазылыпты. Осынау егеменді елде күн сайын жүз беретін жаңалықтар ағынында қасиеті қастерлі, қуанышы орасан мәнді оқиғалар да аз емес. Халықтың жүрегіне жақын, тілеуіне тірек қастерлі жаңалықтардың бірі биыл атап өтілетін Алматы облыстық «Жетісу» және «Огни Алатау» газеттерінің ғасырлық тойы екені де даусыз.
Жетісу жұртының жүрек төрінен орын тепкен бұл басылымдардың ғасырлық тойын атап өту салтанатына санаулы күндер қалды. Қазіргі таңда «Өлке тынысы» ЖШС шаңырағында бас біріктірген екі газеттің басшылары өңірлердегі оқырмандарымен жүздесіп, өткен ғасырдың басындағы төңкерістер толқынында өмірге келген қарт басылымдардың тарихы мен редакция ұжымдарының бүгінгі тыныс-тіршілігін оқырмандарына кеңінен таныстырып келеді.
«Өлке тынысы» ЖШС директоры Мейрам Жанәділов бастаған бір топ журналистер Панфилов ауданындағы оқырмандарымен жүздесті. Жылышырайлы, емен-жарқын жүздесулер үстінде жергілікті оқырмандар редакция ұжымының уақыт үрдісімен үндескен тынысын танып, өздерін мазалаған, қызықтырған сауалдарына да жауаптар тапты. Кездесуде Мейрам Базарұлы ғасырлық той қарсаңында облыс әкімі Амандық Баталовтың қолдауымен оқырмандар мен журналистер арасында әртүрлі мәдени шара өткізілгенін, ақындар мүшәйрасы, спорттық жарыстар сияқты додалардың жеңімпаздары лайықты дәрежеде марапаттарға ие болғанын тілге тиек етті. Сонымен қатар, уақыт қарқынымен қадамдасып, бұқара арасынан қалың оқырман қалыптастырған газеттерді басқаратын Әміре Әрін мен Атсалим Идиговтің жоғары кәсіби шеберліктеріне тоқталды. Кездесуге қатысушыларға «Жетісу» газетінің редакция меңгерушісі Қуаныш Тұнғатар газеттер тарихын тәптіштеп таныстырды.
Кездесуде Панфилов ауданы әкімінің орынбасары Роза Мағрупова, Панфилов ауданының Құрметті азаматы Шәріпхан қажы Тұрғанов, белгілі кәсіпкер Суриям Изимова, республикалық ұйғыр этномәдени орталығының өкілі Құрбанбүбі Ашимова сөз сөйлеп, аймақ журналистерін айтулы мерекесімен құттықтап, газет ұжымына шығармашылық жетістіктер тіледі. Ал екі газеттің ұзақ жылдардан бергі тұрақты оқырмандары зейнеткер Ботакөз Мұзақова, «Ернар» ШҚ есепшісі Оралбек Ыбраев, Жаркент гуманитарлық-техникалық колледжінің студенті Анель Байсеркеева, Н. Голавацкий атындағы орта мектеп мұғалімі Наталья Алтынбекова және оқушы Милана Якупова жандарына жақын басылымдардың оқырмандары ортаймай, әлі де ғасырдан-ғасырға нық қадам басуына тілектестіктерін білдірді.
Кездесу соңынан тұрақты оқырмандарға қос газет тарапынан Алғыс хаттар мен бағалы сыйлықтар тапсырылды.
Мырзағали НҰРСЕЙІТ
Панфилов ауданы
