Бүгін таңмен таласа жұртшылық ҚР Парламенті Мәжілісі мен барлық деңгейдегі мәслихат депутаттары сайлауына асықты. Бұл туралы "Жетісу" газеті хабарлады.
Алдымен Талдықорған гуманитарлық-техникалық колледжіндегі №970 сайлау уческесіне бардық. Жалпы, аталмыш білім ордасынан 2539 тұрғын дауыс бере алады. Оның 57-сі таңмен таласа дауыс беріп үлгерген.
Күн жексенбі болғанына қарамастан мұнда келушілердің белсенділігі байқалады. Дауыс беруге сағат 7:00 болмай жатып жиналғандар қарасы көп. "Әр адамның дауысы маңызды" деп тұрғындар толассыз ағылуда. Ел болашағы үшін, әркім халыққа жақын партиясын таңдауда. Сайлауға алғаш келгендердің бірі, Талдықорған қаласының тұрғыны Санияз МҰҚАШЕВ:
- Ел алдында өз парызымды өтеу, елімнің ертеңі, үздік партияны таңдау үшін дауыс беруге келдім. Бұл - әр азаматтың парызы. Біздің дауыс аса маңызды. Сондықтан, Қазақстанның болашағына қатысты науқаннан шет қалмау керек, - деп халықты сайлауға барып, таңдау жасауға шақырды.
Айдар ҚАЛИЕВ
Талдықорған қаласы
Алматы облысы