Талдықорған қаласындағы «Чак-чак» атты дүкенде тәтті тоқаштың небір түрі саудаланады. Ал олар негізінен өздерінің цехында әзірленеді. Басшысы Айгүл Сыдықова мемлекеттік қолдаудың арқасында дүкенге қажет қондырғылар мен кондитерлік өнім өндіретін жаңа құрылғыларға қол жеткізген.
Айта кетейік, «Сыдықов» жауапкершілігі шектеулі серіктестігі 2014 жылы «Бизнестің жол картасы – 2020» мемлекеттік бағдарламасы аясында «ВТБ» банк арқылы қол жеткізген 15 миллион теңгеге алдымен қажетті қондырғылар мен болашақ дүкен ғимаратын сатып алады. Бүгінде осы дүкен цехында нан-тоқаш пен тәттілердің небір түрі пісіріліп, бірден сөреге қойылады. Көпшілікке ұсынылатын тәттілерге тек отандық шикізат қана қолданылады. Кәсіпкер келіншектің айтуынша, ол тәттілер пісіруді бала жасынан жақсы көріпті. Оған анасы себепкер болған.
Сондықтан болар, оның бұл істе тәжірибесі мол әрі сауда саласында біраз жылдар еңбек еткен. Кейіннен аталған іске деген құлшынысы артып, нәтижесінде осындай орынның ашылуына ықпалын тигізген. Айгүл Ниетқызының бизнеспен айналысып, кәсібін жандандыруға негізінен отбасы мен «Даму» қорының көп көмегі тиіпті. Бүгінде кәсіпорында оннан аса адам тұрақты жұмыспен қамтамасыз етілген. Дәмді өнімдерге де сұраныс аз емес көрінеді. Сұраныс көбейген сайын еңбеккерлер қатары да толыға түсуде. Цехта жұмыс істейтіндердің басым бөлігі өз ісінің шеберлері.
Білікті мамандар жаңадан келгендерге бар білгендерін үйретіп, тәжірибелерімен бөлісуді де назардан тыс қалдырмайды. Сөйтіп, ауызбірлігі жарасқан ұжым өз жұмыстарын жандандыруда. Әсіресе, олар санға емес, сапаға көп мән береді. Сол себепті жаңа піскен өнімдер дүкен сөресінде ұзақ жатып қалмай, тез өтіп кететін көрінеді. Кәсіпкер келіншектің алға қойған жоба-жоспарлары да ұшан-теңіз. Алдағы уақытта өнім түрін еселеп, өндіріс ауқымын кеңейту жоспарға алынған.
Айгүл Байбосынова