Оқи отырыңыз
Кәсіпкерлерге қызмет көрсету орталығында «Табысқа жетудің 7 қадамы» атты түсіндіру акциясы өтті. Онда 100-ден аса жас кәсіп ашудың қыр-сыры бойынша кеңес алды.
Шараның басты мақсаты кәсіпкерлік саласындағы мемлекеттік қолдау шараларын кең көлемде түсіндіру және жастарды бизнес-жобаларды іске асыруға тарту. Облыстық кәсіпкерлер палатасының сарапшысы Сәния Наурызбаеваның сөзінше, акцияның «Табысқа жетудің 7 қадамы» аталуы кездейсоқ емес. 7 қадам деген жаңадан бастаған кәсіпкерлермен қатар, тәжірибелі кәсіпкерлер үшін де қажетті және пайдалы 7 қызмет түрі болып табылады.
– Бірінші қадам – бұл «Кәсіпкердің жеке кабинеті» жобасы. Жоба аясында бизнеске арналған ең маңызды қызмет түрлері тегін ұсынылады. cabinet.atameken.kz сайтына тіркелген соң кез келген кәсіпкерге тиісті ақпарат пен қызмет түріне тұрақты қолдану мүмкін болады. Қолжетімді қызмет түрлері тізімінде 100 тегін құжаттар үлгісі бар «Құжаттар конструкторы», кәсіпкерлер ұсынысы жарияланатын «Кәсіпкерлік бастамалар», серіктесті түрлі көрсеткіш бойынша тексеруге мүмкіндік беретін «Адалдықты тексеру» және тағы басқа қызметтер бар, – деп атап өтті сарапшы.
Содан кейін «Digital КҚКО» (КҚКО - Кәсіпкерлерге қызмет көрсету орталығы) қосымшасын пайдалану арқылы кәсіпкерге 61 түрлі қызмет тегін көрсетіледі. Кәсіпкерлік негіздерін оқытуға, бизнес-жоспар мен сайт әзірлеуге өтініш беруге мүмкіндік бар. Басты ерекшелік – қызметтердің бәрін онлайн режимде алуға болады. «Табысқа жетудің 7 қадамы» тізімінің ішінде болашақ кәсіпкерлер үшін бухгалтерлік және салық есебі, құқықтық мәселелер, маркетинг мәселелесі бойынша кеңестер, «Даму» қорының желісі бойынша кәсіпкерлікті дамыту кеңестері ұсынылды.
Осы және өзге де қызметтер мен қолдау құралдары жас кәсіпкерлер, студенттер мен жұмыссыз жастарға кәсіпкерлерге қызмет көрсету орталығының менеджер-кеңесшілері тарапынан кеңінен түсіндірілді. Шара барысында жастар қызықтырған сауалдарына жауап алып қана қоймай, кәсіп бастаудың алғышарттары мен бизнестегі лайықты саланы анықтай алды. Сонымен бірге, шараның қорытындысы ретінде арнайы бизнес-тренинг ұйымдастырылды.
– Бүгінгі таңда жастар бизнестің түрлі бағыты бойынша тегін кеңестер мен жобаларын сүйемелдеу бойынша көмекті кәсіпкерлер палатасы мен кәсіпкерлерге қызмет көрсету орталығына жүгініп, ала алады. Кәсіпкерлік негіздерін үйрену мақсатында болашақ кәсіпкерлер «Бастау», «Бизнес Кеңесші», «Жас кәсіпкер мектебі» сияқты жобаларға қатысып, білімін шыңдауға мүмкіндігі бар. Содан соң жобаларын қаржыландыру үшін «Бизнестің жол картасы – 2020» бағдарламасы негізінде қайтарымсыз мемлекеттік грант алуға, «Еңбек» нәтижелі жұмыспен қамту және жаппай кәсіпкерлікті дамытудың 2017 – 2021 жылдарға арналған бағдарламасы аясында төмен мөлшердегі несиелендіруді алуға болады, – деді Талдықорған қаласының кәсіпкерлерге қызмет көрсету орталығының менеджер-кеңесшісі Меруерт Бакибаева.
Кәсіпкерлер палатасының ақпаратынша, жыл басынан бері кәсіпкерлерге қызмет көрсету орталығықтарында 4 202 азаматқа 4 967 сервистік қызмет көрсетілген, оның 11 пайызы 29 жасқа дейінгі кәсіпкер саналады. Сонымен бірге өткен 11 айда 15 686 кәсіпкерге 19 121 кеңес берілді. Соның 20 пайызы 29 жасқа дейінгі жастар. 26 жастағы Асқар Дәуренов акция барысында бизнес негіздері бойынша оқуға жазылып, заңгер мен маркетологтың кеңесін алды. Қазіргі таңда ол жеке компанияда қызмет атқарып келеді. Мақсаты – өз кәсібін ашу.
– Барлық кеңесшіні аралап, олардың кеңесі мен ақпаратын алдым. Қуантарлық жайт, көрсетілген барлық қызметті онлайн режимде алуға болады. Шарадан кейін бизнес саласы мен болашақ жобамды қалай іске асыру керектігін түсіндім,– деді ол. Жалпы «Табысқа жетудің 7 қадамы» шарасына 120-дан аса жас қатысты.
Айта кетейік, қазіргі таңда өңірдегі 9 мыңнан аса кәсіпкерлік субъектісін 29 жасқа дейінгі жастар басқарады. Бұл облыста тіркелген бизнес субъектілердің 8 пайызын құрайды.
Айгүл Байбосынова
