Жетісу облысында жеңіл автокөліктің ғимараттың кіреберісіне соғылған сәті түсірілген видео әлеуметтік желілерде кеңінен тарады, – деп хабарлайды 7-su.kz ақпараттық порталы.
Instagram желісіндегі krisp.tdk парақшасында жарияланған бейнежазбада ақ түсті жеңіл автокөліктің ғимараттың баспалдағына алдыңғы бөлігімен шығып кеткені көрінеді.
Оқиғаға қатысты Жетісу облысы полиция департаменті түсініктеме берді. Ведомствоның мәліметінше, аталған көлік заңсыз иемденілген.
«Көлік құралын заңсыз иелену фактісі бойынша қылмыстық іс қозғалды. Алдын ала мәліметтерге сәйкес, ер адам автокөлікті заңсыз айдап кеткен. Кейін Қабанбай батыр көшесімен келе жатып басқа көлікпен соқтығысқан. Осыдан соң көлікті басқара алмай, ғимараттың кіреберіс бөлігіне соғылған», – деп хабарлады полиция.
Оқиға салдарынан ешкім зардап шеккен жоқ.
Күдікті полиция бөліміне жеткізілді. Қазіргі уақытта қажетті тергеу амалдары жүргізіліп, оқиғаның барлық мән-жайы анықталып жатыр.
Полиция тексеру қорытындысы бойынша заңға сәйкес процессуалдық шешім қабылданатынын мәлімдеді.
Сондай-ақ тәртіп сақшылары азаматтарды заң талаптарын сақтауға шақырып, кез келген заңсыз әрекет заңмен белгіленген жауапкершілікке әкелетінін ескертті.
