Сарқан қаласында тұрғындар мен қала қонақтарына арналған «Саялы төрім – Сарқаным» атты жазғы мәдени-спорттық кештер сериясы өз жалғасын тапты, – деп хабарлайды 7-su.kz ақпараттық порталы.
Бұл жолғы мерекелік басқосу қаланың көрікті орындарының бірі «Қойтас» эко саябағында ұйымдастырылды. Бағдарлама аясында балалар мен жасөспірімдерге арналған көңілді эстафеталық жарыстар, тартысты спорттық сайыстар орын алды. Сонымен қатар, жаздың аптап ыстығында қатысушыларға ерекше серпіліс сыйлаған «Арбуз Party» қызықты шарасы өтіп, келген қонақтарға дәмді қарбыздар ұсынылды.
Бұл бастама аудан халқының бос уақытын тиімді ұйымдастыруға, бұқаралық спортты дамытуға және салауатты өмір салтын қалыптастыруға үлкен септігін тигізеді.
Мерекенің екінші бөлігі Сарқан ауданының жергілікті өнерпаздары дайындаған эстрадалық концертке ұласты. Сахна төрінде шырқалған әуезді әндер мен мың бұралған бишілердің өнері жиналған жұртшылыққа көтеріңкі көңіл-күй сыйлады.
«Сарқанда өтіп жатқан мұндай жазғы кештер – тұрғындар арасындағы ауызбіршілікті арттыратын, отбасылық демалыс мәдениетін қалыптастыратын маңызды жоба. Бұл тек ойын-сауық емес, ұрпақтар сабақтастығы мен достықты нығайтатын игі бастама», – деп атап өтті ұйымдастырушылар.
Жетісу өңірінде бұқаралық демалыс орындарын абаттандыру, жастарды бұқаралық спортқа баулу ісі жүйелі түрде жүзеге асырылып келеді. Мұндай мәдени бағдарламалар кіші шаһарлар мен ауылдық аймақтардағы әлеуметтік өмірдің жандануына, жас ұрпақтың табиғат аясында салауатты демалуына тікелей ықпал етеді.
«Саялы төрім – Сарқаным» жобасы жаз соңына дейін жалғасып, алдағы уақытта да тұрғындарды жаңа форматтағы мәдени-спорттық шаралармен қуантпақ.
